Katrín í Ástralíu

Jólakveðja frá Melbourne

2008-12-24T00:34:00.003-01:00

Jæja, þá er sumarveðrið loksins komið hér í borg; sól, sól, sól flesta daga og smá hiti. Enda tími til kominn að sumarið léti sjá sig - kaldur og vindasamur vetur að baki. Síðustu dagana höfum við rölt um á stuttbuxum og stuttermabol, horfandi á jólaskreytingar og hlustandi á jólalög. Hálf undarlegt - en verulega ljúft :o)
Þessi jólin verða því doldið spes; stuttbuxur, stuttermabolur, sól, hiti, sólarvörn, sólgleraugu og grill með félögum. Hljómar vel!

Kæru vinir og ættingjar, ég óska ykkur gleðilegra jóla. Megi nýja árið vera ykkur friðsælt og hamingjuríkt.

gráðan í höfn

2008-12-12T04:57:00.004-01:00

þá er það staðfest...mastersgráða í viðskiptafræði (stjórnun) er í höfn!! :o)

Kvöldverður útskriftarhópsins var í gærkvöldi og það var mikið gaman. Dýrindis veitingar, ljúfir djass tónar og yndislegt fólk. Svo komu einkunnirnar í dag - bros út að eyrum, gráðan í höfn :o)

Kæru vinir og ættingjar, takk kærlega fyrir stuðninginn - án ykkar hefði þetta nám verið töluvert erfiðara.

Prófatíð

2008-11-13T12:35:00.006-01:00

Þessi önn í skólanum hefur liðið hratt, þaut framhjá á ógnarhraða og nú blasa blessuð prófin við.

Smá update á lífinu frá síðasta bloggi (september):

Sydney var frábær - gaman að hitta ættingja sína :o)
Skóli og hópavinna og verkefnaskil
Skóli og hópavinna og verkefnaskil
Og enn meiri skóli...
Ammrískar pönnukökur þegar við fylgdumst með forsetakosningunum í Ammríku
30+, hiti og sviti í 91% raka (rakastigið í dag)

Lífið hér á Svanastræti hefur verið ljúft, eftirfarandi eru yndisleg "Aussie" minningabrot síðustu vikna:

bangers & mash (pulsur og kartöflumús; einfalt, fljótlegt og þægilegt=námsmannavænt!)
sunnies og sandalar (getur flækst fyrir manni!)
úrslitaleikurinn í AFL (mega fan! stubby hefði toppað'etta)
kanga bangas (kengúrupulsur)
meat pie
woolies (nenni ekki aftur...!)
barbie (grill, nokkrum sinnum)
lemonade (nokkrir lítrar!)
bráðnað súkkulaði (tengist það eitthvað lofthitanum?)
wee bit of grog (organised by the kiwi)
Waltzing Matilda (sungið reglulega hér á bæ)

Og þá erum við komin að prófunum sem þetta blogg byrjaði á. Fjögur stykki próf-skemmtilegheit framundan, þar af þrjú á þremur dögum. Það verður bara gaman :P

Var ég búin að minnast á hve gaman það er að vera í þessari borg (Melbourne), þessu landi? :o)

skólinn og Sydney

2008-09-19T10:47:00.002-01:00

eitt próf afstaðið í kvöld - gott að klára svoleiðis

á morgun er það svo Sydney! :o)

og svo tekur skólinn aftur við - þó það heiti að vera vorfrí núna, þá virðist þetta "frí" einkennast af verkefnavinnu

óperudagur

2008-08-31T10:59:00.003-01:00

Í gær (laugardag) var óperudagur.

Vorum mætt snemma til að vera við svokallað pre-concert talk.
Eftir það skoðuðum við okkur um í húsinu sem tónleikarsalurinn er í (smá stórt hús, eru til dæmis rúllustigar á milli sumra hæða).

Og svo byrjaði fíneríið; Hollendingurinn fljúgandi.
Sinfóníuhljómsveit Melbourne, stóóóór kór og einsöngvarar.
Óperan var fínasta skemmtun. Svo hvítvín og góður matur á eftir.
Í stuttu máli; alveg frábært kvöld.

Finnst annars eins og lífið mitt sé á hraðri áframspilun þessa dagana; dagarnir fljúga áfram.
Skólinn virðist nýbyrjaður - en nú þegar eru fimm vikur liðnar af þessari önn.

Fólkið með fánann - tónleikar Sigur Rós í Melbourne

2008-08-02T05:49:00.009-01:00

Sigur Rós var með tónleika hér í Melbourne í gær.
Og meðal áhorfenda í salnum voru fimm Íslendingar og félagar þeirra :o)

Vorum komin frekar snemma á tónleikana. Litla fólkið (ég) vildi nefnilega vera framarlega til að sjá nú eitthvað af fólkinu á sviðinu.

Það sem tók við var...
miiiikið fín tónlist
flott og töff listræn umgjörð
...og við með íslenska fánann.

Það að vera á tónleikum með Sigur Rós og sveifla íslenska fánanum í takt við tónlistina, var sérstök tilfinning.
Þarna vorum við, fimm Íslendingar, svo órafjarri Íslandi - landinu okkar
Að hlusta og horfa á Sigur Rós - samlanda okkar
Að hlusta á einstaka orð á íslensku - tungumálinu okkar
Að sveifla íslenska fánanum - fánanum okkar

Og þjóðarstoltið blossaði sem aldrei fyrr.
Í mannhafinu vorum við fimm eins og Ísland í Atlantshafinu; fámenn og stolt.

Hljómsveitin virtist hafa tekið eftir litla fánanum okkar; fengum sérstakt klapp frá Jónsa í lok tónleikanna :o)

Vetrarfrí

2008-07-16T06:38:00.005-01:00

Vetrarfrí í skólanum - virkilega ljúft.

Sofa
Lesa góðar bækur
Smærri ferðalög
Hitta vini
Kíkja á söfn, ágætis dægradvöl í vetrarkulda
Sellótónleikar
Sofa
Vera kúridýr
Drekka chai te
Einu sinni í yoga, virkilega gott
Fara í labbitúr
Sofa
Píanótónleikar
Horfa á sólina detta bakvið fjöllin og dást að litadýrðinni
Uppgötva réttnefni; fröken Plássfrekína Plássfreksdóttir (ég)

Baka köku - sem festist í forminu!
Það var ansi fyndið, algjörlega skemmtiatriði dagsins :o)

Það er vetrarfrí
Það var vetrarkuldi.
Svo kom vor í vetrarfríinu; búið að vera þægilegur hiti og sól síðustu dagana.

Sesar salat

2008-06-17T06:29:00.003-01:00

Datt í hug að gera Sesar salat um daginn - og þvílík lukka!

Cos salat
Egg
Beikon
Kjúklingur
Franskar kryddjurtir
Parmesan

Skera salat. Sjóða egg og skera það í bita.
Steikja kjúkling og bragðbæta með frönsku kryddjurtunum, bæta svo beikoninu við.
Blanda öllu saman í skál og toppa með parmesan.

Alveg svaka svaka gott :o)

Síðar var afgangnum af salatinu smellt inn í líbanskt brauð og smá grísk jógúrt með - NAMM!

Anzac Day í 95 ár

2008-04-27T06:23:00.004-01:00

Vaknaði við taktfastan trommuslátt fyrir utan gluggann.
Þetta var eldsnemma á föstudaginn, fyrir sólarupprás. Hrökk upp við lætin og var smá hrædd; hvað gengur eiginlega á?!
Örstuttu síðar var hugurinn búinn að ná þessu

- hermenn að marséra um götur Melbourne við trommuslátt og sekkjapípuleik –

til að minnast fallinna hermanna og sýna þakklæti þeim sem barist hafa í stríði fyrir landið sitt, Ástralíu. Þetta var væn fylking af hermönnum, á að giska 40 manns og tveir lögreglubílar keyrðu á eftir. Ekki hægt að lýsa hve flott þetta var svona í morgunsárið; hvílík virðing.

Aussie brekkie í tilefni dagsins; egg og beikon með bökuðum baunum. Svo skundað út til að taka þátt í deginum.

Sex herflugvélar flugu yfir miðborgina. Sáum skrúðgöngu með 15 þúsund fyrrverandi hermönnum og aðstandendum þeirra, með tilheyrandi trommuslætti og sekkjapípuleik. Sumir kappanna voru komnir nokkuð til ára sinna og með heilu borðana af orðum; vitnisburður um það sem þessir menn hafa gert fyrir landið sitt. Inn á milli voru heilu raðirnar af gömlum bílum og herbílar með heldri hermönnum innanborðs. Lögreglumenn stóðu vaktina við skrúðgönguna en höfðu engar byssur, kylfur eða neitt annað eins og þeir yfirleitt hafa – stóðu bara heiðursvörð. Litlir krakkar voru í skrúðgöngunni og stolt báru þau orður afa síns eða langafa, til að halda minningunni á lofti. Ansi sérstakt andrúmsloft við skrúðgönguna; þakklæti, rólegheit og virðing.

Skrúðgangan endaði hjá minnisvarða um fallna hermenn. Á þessum sama stað var minningarathöfn í dögun þar sem 35 þúsund manns minntust þeirra föllnu og þar féllu víst mörg tár, tilfinningarík stund á gríðarlega fallegum stað. Við þessa byggingu logar eilífur eldur til að halda minningu þeirra föllnu á lofti. Að heyra rólega tóna í einu trompeti, á svona flottum stað, þar sem lögreglumenn og hermenn standa heiðursvörð, með öllum þessum fyrrverandi hermönnum og aðstandendum þeirra, er magnað.

Nágranni að flytja

2008-04-14T00:02:00.000-01:00

Íbúi í húsinu er að fara flytja.
Viðkomandi ákvað að smella upp auglýsingu og freista þess að selja eigur sínar, þessar fáu og verðlitlu sem þessi einstaklingur hafði safnað að sér. Meðal þess sem var að finna á “til sölu” listanum, var:
eitt box af tannþráði, $1
tvær teskeiðar, $2
2 súkkulaðistykki, verð óuppgefið

Reyndar spurning hvort þarna hafi verið um að ræða alla 50 metrana af tannþráði sem upprunalega voru til staðar eða ekki.
Teskeiðarnar gætu verið inni í myndinni, verst að okkur vantar bara eina.
Súkkulaðistykkin voru freistandi, en hver selur súkkulaðið sitt?? Skyldi það hafa verið orðið útrunnið? Held það se líklegasta skýringin.

Svo var þessi sami aðili líka að reyna selja símann sinn.

Efast um að við Jón verslum eitthvað hjá nágrannanum, en okkur fannst þessi auglýsing alveg bráðfyndin! :D

Kuldaskóli

2008-03-03T07:00:00.002-01:00

Fyrsti kennsludagurinn í skólanum í dag og ég hlakka mikið til að mæta í tíma dagsins (hegðun fólks í skipulagsheildum).
Eitthvað um 30 gráðu hiti utandyra, mmmm, þægilegt að vera utandyra.
Í kennslustofunni í skólanum er kalt, sem er bara fínt þegar maður vill aðeins kæla sig eftir hitann úti. Það er kveikt á loftræstingunni í kennslustofunni.
Bráðlega er hitastigið innandyra örugglega komið ansi nálægt ísskápshitastigi.

Í frímínútunum þyrpast nemendurnir út, hver í kapp við annan, til að hlýja sér - allir að farast úr kulda þarna inni.

öfugsnúið?

Svo eftir kuldatímann, fer maður aftur út í hitann; tyllir sér á litlar tröppur hjá skólanum og lætur sólina bræða frostnar tásurnar og kuldalamaða fingurna.

Melbourne á ný

2008-02-29T03:26:00.004-01:00

Komin til Melbourne á ný - með kærastanum. Fengum yndislega íbúð rétt hjá skólanum, ferlega þægilegt :o)
Hingað til hefur tíminn farið í hinar ýmsustu útréttingar, til dæmis í bananabiðröðina hjá útlendingaskrifstofunni, fjórar (!) ferðir í IKEA og fleira og fleira.
Fórum á næturmarkað fyrr í vikunni og gæddum okkur þar á krókodíla og strútaborgurum sem voru barasta ansi góðir. Desertinn var svo hollenskar pönnukökur, mmmmm.
Í dag er formlega síðasti dagur sumarsins en þó hljómar veðurspáin upp á eitthvað um 20 gráður fyrir næstu daga. Það kalla ég fínasta haust :o)

freyðivín og súkkulaði

2007-10-23T10:04:00.000-01:00

Í einu námskeiði þessa önnina, voru 12 hópar; hver hópur greindi breytingu hjá fyrirtæki að eigin vali. Greiningin studdist við kenningar í breytingastjórnun og svo þurfti að koma með tillögur að úrbótum. Sett saman skýrsla uppá einhverja tugi blaðsíðna og útbúin stutt kynning (powerpoint) á dæminu.

Mínútu áður en fyrsta kynningin byrjaði, sagði kennarinn að það væru verðlaun:
ein freyðivínsflaska og fínasta belgískt súkkulaði, stór kassi.
Kynningin sem væri best að kennarans mati, fengi eina freyðivín og belgíska fíneríið.
Kynningin sem væri valin best af áhorfendum (people´s choice), fengi líka eina freyðandi og belgískt eðalsúkkulaði.
Þetta var fyrir viku síðan.

Í kvöld var spenna í salnum, því í kvöld skildu verðlaunin afhent. Að bíða í tvo og hálfa klukkustund var einsog að bíða eftir því að opna jólapakkana þegar maður var fimm ára - þvílík eftirvænting!
og biðin virtist aldrei ætla taka enda...

en svo kom loksins að því...

hópurinn minn vann bæði verðlaunin!!! :o)
(það er að segja bæði frá kennaranum og people´s choice)
og við klöppuðum og brostum út að eyrum
og klöppuðum og brostum svo innilega
þetta andartak var alveg frábært - svo sætt, svo svakalega ljúft

en þar sem það gekk nú ekki að láta einn hóp fá öll verðlaunin, fengum við bara önnur. Það er að segja eina freyðivínsflösku og einn kassa af dúndurgóðu belgísku súkkulaði. Ég er vel sátt.

Þetta er sko almennilegur kennari - að hafa flott verðlaun í boði ;o)

um 30 - frábært!

2007-10-15T05:01:00.000-01:00

Núna er klukkan 4 eftir hádegi og það er rétt tæplega 30 gráðu hiti.
Og akkurat þetta hitastig finnst mér mjög þægilegt; ekki of heitt, ekki of kalt.

Bara frábært :o)

Eitthvað hefur þessi hiti hins vegar farið illa í nágranna mína; að minnsta kosti miðað við öskrin og barsmíðarnar, þá hefur annaðhvort heimilisofbeldi eða eitthvað í þeim dúr verið í gangi.

baunasalat

2007-10-13T05:20:00.000-01:00

Þá eru stóru verkefnaskilin í skólanum búin - bara nokkrir dagar eftir í kennslu og svo blasa prófin við. Mikið vildi ég að það væri hægt að hraðspóla áfram þar til seinnipartinn 21. nóvember. Mér finnst próf og próflestur með eindæmum leiðinleg fyrirbæri - klárlega dánsædið af því að vera í skóla.

-nóg um þessi próf-

Í gær....langaði mig í eitthvað fljótlegt og í léttara laginu í kvöldmat. Þetta ljúffenga baunasalat varð fyrir valinu.

salat (cos)
fjórar týpur af baunum
(kjúklinga, nýrna og tvær aðrar
- bara svona fjögurra-bauna-blanda úr dós)
maískorn
ólífur
sveppir
græn paprika
strengjabaunir

Allt dótið skorið niður (nema baunir+maís+ólífur!). Strengjabaunirnar settar útí sjóðandi vatn í örstutta stund. Sveppirnir og paprikan sett á pönnu í smá tíma, bragðbætt með engifer og cumin.

Öllu saman smellt í skál ásamt smá skvettu af extra virgin olive oil.

Baunasalat hljómar ef til vill frekar ógirnilegt en þetta var alveg gríðarlega gott!!

hráslagalegt vor

2007-10-02T11:52:00.000-01:00

það á að heita vor....

en vetrarjakkinn hefur verið notaður að undanförnu.

þó það séu ef til vill einhverjar 17/20 gráður á hitamælinum...

þá er barasta skítakuldi.

Svona er þessi vindur.
Íslenska rokið er flutt til Melbourne.

dýrðlegt súkkulaði

2007-09-17T10:09:00.000-01:00

Það eru tvær súkkulaðibúðir hér í Melbourne, sem eru alveg hreint dýrðlegar. Kíkti á annað þessara dýrðlegu súkkulaðihúsa um daginn og prófaði heitt súkkulaði með kanel - þvílíkt lostæti.

Þessi mynd er frá því í júlí - þegar vænn drengur splæsti í súkkulaðiveislu handa dömunni sinni...

Í oggu ponsu pínulitlum bæ, sem þessi sami drengur og stúlka heimsóttu í júlí, leyndist dýrindis súkkulaðiverslun. Og auðvitað varð að prófa eins og einn mola með heitu súkkulaðinu.

nammigott

2007-09-08T10:51:00.000-01:00

nenniggi elda kvöldmat
+ "hef ekki lyst á því að borða neitt af því sem mér hefur dottið í hug"
= þetta hérna...

græn paprika
rauð paprika
kúrbítur
brokkolí
strengjabaunir
svartar ólífur

skorið niður
og svo smellt á pönnu ásamt vænum slurki af hnetum

kjúklingabaunir (úr dós) - amm, líka á pönnuna

kjúklingabringa, skorin í litla bita og elduð.
bætt útí grænmetið+ sem er á pönnunni

bragðbætt með lime safa, chermoula, koríander og engifer

ferlega fljótlegt,
og skruggu-gott :D

sýnishorn af sumri

2007-08-27T04:26:00.000-01:00

Ansi skemmtileg tilbreytni, að finna heita goluna koma blíðlega inn um gluggann svona í morgunsárið þegar maður var að vakna. Sólargeislar, heit gola og heiðblár himinn....oh, svo ljúft.

Labba svo í skólann á
thongs (sandölum),
kvartbuxum,
stuttermabol
og auðvitað með sólgleraugu á nebbanum
- yndislegt :o)

Fyrsti dagurinn þetta vorið/sumarið með einhverju almennilegu hitastigi og heitri golu...alveg hreint frábært.
Ágætis sýnishorn af sumri :o)

nýtt tungumál

2007-08-13T09:17:00.000-01:00

amm...er í tungumálanámi, era læra viðskiptaensku.

Eða sko, mér líður doldið þannig af því í fyrstu skildi ég ekki eitt einasta mikilvægt orð í bókinni í bókhaldinu og það tók alveg ofsalega langan tíma að komast framúr fyrstu köflunum. Tilað bæta svörtu oná kolgrátt, þá talaði kennarinn gríðarlega hratt í fyrsta tímanum og maður þurfti að hafa sig ALLAN við til að fylgjast með. Og þetta eru akkurat engar ýkjur - eyrun voru ca dottin af eftir þennan tíma. Einbeitingin var líka þvílík og það stanslaust í 2 klukkustundir, að ég gat ekkert annað gert það sem eftir lifði þess kvölds. Og ég hélt að maður væri orðinn smá sjóaður eftir að hafa verið í skóla síðasta eitt og hálft árið...

Reyndar fínt að byrja á svona "sjokk" tíma....tímarnir geta amk varla orðið verri en þessi.

En.....og stórt EN....það er virkilega gaman að svona áskorun, gaman að fara í eitthvað algjörlega nýtt og já, líka ansi góðan skóla. Það reynir á og er doldið krefjandi. Lesa í risastóru bókhaldsbókinni, með orðabókina við hliðina, og finnast akkurat ekkert ganga. Að vita svo fyrir víst að erfiðið skilar árangri er ansi sæt tilfinning og auðvitað mjög hvetjandi. En það eru lokaprófin í nóvember sem skipta öllu....og þau eru víst ekkert djók. Ég tel vænlegast að halda bara áfram sama plani, lesa fyrir alla fyrirlestra og reikna öll dæmi fyrir dæmatíma....sjáum svo í desember hverju þetta plan skilar.

En maður er nú ekki alltaf að drekkja sér í viðskiptaskruddunum....

á föstudögum hittist lítill hópur af nemendum og horfir á bíómynd um ástralska sögu, ástralskt samfélag. Allavega svona ástralskt eitthvað. Um daginn sáum við Rabbit-Proof Fence og síðasta föstudag var það The Tracker. Báðar myndirnar hafa sterk skilaboð og ýttu undir ansi fjörlega umræðu um frumbyggja þessa lands - málefni sem er jú einnig í brennidepli á pólitíska sviðinu. Tilheyrandi að deila smá bút....
Hvernig ætti að bregðast við barnanauðgunum og alkóhólisma meðal frumbyggja þessa lands?
Er herinn rétta aflið til að taka á þessu flókna máli?
Er árangursríkasta leiðin að banna sölu áfengis til frumbyggja?
Á forsætisráðherrann að búa til "fyrirgefið dag" og biðjast þannig afsökunar á gjörðum hvíta mannsins gegn frumbyggjunum, með tilheyrandi fjárútlátum og játa ábyrgð á því sem gerðist fyrir áratugum síðan?
Á að greiða frumbyggjum, sem voru ungir að aldri numdir á brott frá foreldrum sínum, skaðabætur?
Alls konar svona spurningar vakna eftir þessar sterku kvikmyndir - spurningar sem rata á forsíður dagblaðanna þessa dagana.

Jæja, þessi skrif eru orðin rækilega pólitísk. Allt í lagi að varpa fram spurningum, en persónulegum skoðunum held ég utan þessa opna ritsvæðis.

Hrísgrjónagrautur - mmmm....

síðustu vikur

2007-07-19T06:49:00.000-01:00

Hvað hefur upplifast síðustu vikur?

Fyrst er að nefna......mastersgráða!! :D
Og hvað gerir maður þegar einn master er kominn? Tekur nokkra daga frí og byrjar svo nottla á öðrum master ;o)

Frí - hitt og þetta brallað og skoðað. Meðal annars alveg yndislega, pínuponsulítill bær.....vorum ca. einu ferðamennirnir þarna. Vorum í fríi lengst úti í sveit í rigningu, snjókomu og skítakulda. Vinsælustu atvikin voru að sjá skilti sem á stóð "open fire", þeas veitingastaður með arin þar sem var hægt að hlýja sér. Og jújú, drukkið ótæpilegt magn af kaffi og heitu kakói.

Tengt lið númer tvö....þá hefur verið óvenju kalt í Melbourne. Þriðjudagurinn var til dæmis kaldasti dagurinn í einhver 10 ár (og já, þetta var sko íííískalt!). Svo hefur rignt á hverjum einasta degi í einhverjar vikur, varla stytt upp milli skúranna. Eftir áralangan þurrk og vatnsskort, kemur öll rigningin í einu - það hreinlega styttir ekki upp. Einsgott að eiga regnhlíf ;o)

páskaegg!!

2007-06-28T04:12:00.000-01:00

Það leyndist óvæntur glaðningur í ferðatösku sem birtist á gólfinu heima hjá mér á þriðjudagsmorguninn......PÁSKAEGG!!
Amm, páskarnir voru extra seint (eða extra snemma) á ferðinni heima hjá mér :o)

Í hönd fóru nokkrar rökræður um það hvernig opna skildi páskaeggið. Pilturinn vildi vera nettur á þessu og ýta bara pent á litla lokið þarna aftan á egginu. Stelpan vildi fara aðra leið. Eftir smá rökræður var aðferðinni "fimm ára Katrín" beitt á súkkulaðieggið. Þessi aðferð er mjög einföld og fljótleg; hnefinn krepptur og lamið örsnöggt og af afli ofan á páskaeggið. Auðvitað smallast páskaeggið og súkkulaði út um allt (innan í pokanum), en það er líka bara stemmning.

Í viðbót við páskaeggjasúkkulaði japlar stúdentinn á íslenskum stúkkulaðirúsínum og harðfisk. Verst að lifrarpylsan var gerð upptæk í tollinum, sveiattan.

eftir USA

2007-06-25T06:02:00.000-01:00

Jæja, USA ævintýrið búið. Tíminn nýttur til hins ýtrasta; svo vel nýttur að stelpan var alveg úrvinda þegar heim var komið. Svaf tvisvar sinnum ca 18 klukkustundir! Fyrstu nóttina rumskaði ég eitthvað smá eftir 16 tíma svefn og hélt svo bara áfram að sofa í tvo tíma í viðbót. Held ég hafi nú bara sjaldan á ævi minni sofið svona svakalega mikið....

Ferlega fyndið og líka skrítið að eiga afmæli um borð í flugvél. Flugfélagið var elegant á þessu; bauð ammlisbarninu kampavín áður en vélin fór í loftið og svo líka rétt fyrir lendingu. Svo hefur þetta flugfélag líka extra langt á milli sætanna og hægt að halla sætinu frekar mikið. Þannig að jájájá, þetta var bara fínasta ammli :o) held ég hafi reyndar sofið ammlið sjálft af mér, þeas verið sofandi þegar vélin flaug yfir daglínuna.

Dagurinn í dag fór í skriffinnsku.
Eða ok, þetta byrjaði í gær; fyllti út eyðublað sem var litlar 24 blaðsíður. 24!! Ein undirritun var ekki nóg, heldur þurfti þrjár undirritanir frá stelpunni á þennan pappírsbunka. Það er aldeilis - mætti halda maður væri frægur ;o)

Í dag byrjaði svo ballið fyrir alvöru...fara með pappírsbunkann í stóra húsið (útlendingaeftirlitið) ca á móti Þinghúsinu.
Bíða í biðröð. Bíða. Bíða.
"Ég er að koma með þessa umsókn..." og var afhent númer um leið og konan sagði "það er doldið löng bið í dag, gæti orðið um það bil hálftími"
1, 2, 3, 4, ..... taldi gróflega fólkið sem beið í salnum. Ca 100 manns að bíða, í alltof litlum sal. Troðningur og svitafýla.
Og loksins kom að mér, eftir ekkert svo langa bið.
Stelpan við tölvuna pikkaði eitthvað inn, "svona, komið, þú þarft ekki að hugsa meira um þetta"
Jess, lítið mál! hugsaði ég en var samt ekki alveg að trúa þessu....fór á netið, skoðaði ferlið og hringdi líka í þetta apparat. Höfðu orðið smá mistök, starfsmaðurinn hafði ekki þekkt þetta nógu vel, mér sagt að koma aftur.
Ég trítlaði aftur niðrettir í stóra húsið ca á móti Þinghúsinu.
Beið í biðröð. Beið og beið og beið....til að fá miða í næstu biðröð. En nei, enginn miði. Í þetta sinn var mér sagt að hringja í eitt símanúmer og panta viðtalstíma.
Tók upp tólið og hringdi.
"Velkomin(n)....í dag er mikið að gera hjá okkur, afsakaðu töfina....." og ég beið. Beið. Beið. Og beið í símanum.
Loksins svaraði einhver á hinum enda línunnar. Spurt um fjölskyldunafn, eigið nafn, heimilisfang, póstfang, póstnúmer, símanúmer, tölvupóstfang....Og allt stafað tvisvar sinnum og endurtekið tvisvar sinnum - verður að vera rétt, jú sí.
Einhvern veginn hafði ég þá ranghugmynd að það væri einfalt að panta viðtalstíma klukkan 3 á morgun - það tókst loksins eftir 10 mínútna símtal og skráningu á hinum ýmsustu upplýsingum.

Svo sem fínt að eyða deginum í eitthvað svona innandyra-biðraða-skriffinnsku-apparat því það er svo skrambi kalt utandyra. Mér finnst samt miklu skemmtilegra að kíkja á kaffihús :o)

USA

2007-06-12T02:28:00.000-01:00

Jæja, þá er bara að græja örfáa hluti.....og ég er farin til USA! :D

Flugið fer á hádegi á morgun, miðvikudag, kl 12:00pm.
Þessi tímasetning hefur fengið mig til að spá doldið í klukkunni og flugi. Einsog ég sé það, þá getur þessi tímasetning verið mikið villandi. Hvort er td átt við að flugið sé á hádegi eða á miðnætti?
Þegar klukkan er akkkurat hádegi, hvort er hún þá am eða pm? Og sömuleiðis, þegar klukkan er akkurat miðnætti, hvort er hún þá am eða pm?
Mér finnst fáránlegt að flug - eitthvað sem maður vill alls, alls ekki missa af - hafi svona líka villandi tímasetningu. Legg til að það verði alfarið tekin upp 24 tíma klukka í fluginu, sleppa þessu am og pm. Þegar klukkan er í 24 tíma kerfinu, þá leikur enginn vafi á hvað klukkan er, hún 12 (hádegi) eða 00/24 (miðnætti). En auðvitað má deila um það hvort 24 tíma klukkan ætti að byrja á núlli (enda á 23:59), byrja á 00:01 (enda á 24) eða hreinlega byrja á 1 (enda á 24:59). En ég tel að það breyti litlu, 00/24 væri miðnætti og því yrði td 00:30 og 24:30 jafngilt (30 mínutur eftir miðnætti).
Og já, þetta er ekki í fyrsta sinn sem svona flug/klukku pælingar koma upp....varð að fínustu verk/stærðfræðilegu röksemdafærslum fyrir nokkrum mánuðum. Skemmtilegar pælingar.

Jebbs, USA.....nánar tiltekið Salt Lake City, með fólki sem kemur frá öllum heimsins löndum. Hún ég hlakkar alveg sooooona mikið til :o)
Fer í loftið 13. júní og lendi sama dag, 25 mínútum eftir að vélin fór í loftið.....þrátt fyrir að hafa stoppað smá á Nýjá-Sjálandi og flogið yfir allt Kyrrahafið. Talandi um að fljúga hratt, ha! hehe...
Brottför frá Salt Lake City 17. júní og lent í Melbourne þann 19. Sem þýðir......daramm daramm....að ég mun eiga afmæli (18. júní) í háloftunum þetta árið! Verð greinilega ansi hátt uppi þennan ammlisdaginn, hehe....
Helsta spekúlering matvælafræðingsins: Skyldi Loft New Zealand bjóða ammlisstelpunni uppá ammlisköku (súkkulaðiköku takk, ekkert rjómaklessufínerí)? Kemur allt í ljós...

Til að hafa það á hreinu, þá hef ég marg dobbúl tjékkað þennan tíma á fluginu....og það er hádegi ;o)

Katrín

2007-06-10T06:49:00.000-01:00

Skemmti mér iðulega hið besta við það að sjá hvernig Ástralarnir höndla nafnið Katrín. Katrin, einsog ég segi það í þessu landi, er jú doldið líkt nafninu Catherine þannig maður gæti freistast til að halda að þetta væri lítið mál.

Í dag....Caroline. Amm, ekki spyrja mig hvernig Katrin varð að Caroline - en mér fannst þetta allavega mjög svo fyndið :D

Catherine
Katherine
Cathy
Cathrin
Kathrin
eru dæmi um útgáfurnar af nafninu mínu....finnst nú bara skemmtilegt að sjá hinur ýmsustu útfærslur :o)

og jú, líka Katrin....hef einu sinni séð það þannig. Trúði því varla.

eigum við eitthvað að fara út í Stefansdottir?
vandræðalegar viprur á andliti viðkomandi og spyrjandi augun....
ég bara stafa herlegheitin, tel það vera heppilegast.
S-T-E-F-A-N-S....og hér er viðkomandi yfirleitt kominn að endimörkum línunnar...og lítur á mig vandræðalegum augum. Og ég hugsa "nei nei góði minn, þetta er sko ekki enn komið..."
D-O-T-T....hér kemur oft smá stuna (=er þetta endalaust nafn?!)
I-R..."wow, that´s a tongue twister!" eða "that´s a long one" segir viðkomandi svo oftast, eða eitthvað í þá áttina

Í tengslum við þetta, hvernig fer fólk að, utan Íslands, sem hefur enn "erfiðari" nöfn en Katrín? Var bara svona spá...

vinningslið

2007-05-29T10:44:00.001-01:00

ég var ekki í hópíþrótt þegar ég var yngri

kemur því kannski ekki á óvart,
að ég upplifði það ekki að vera í vinningsliði í hópíþrótt
(jamm, afleiðing fyrstu fullyrðingarinnar)

hins vegar.....í dag, upplifði ég það að vera í vinningsliði.
(reyndar ekki í fyrsta sinn) - og já, það var í skólanum.

það er eitthvað magnað sem gerist þegar við þrjú vinnum saman....
sköpunarmátturinn spanast upp,
þorstinn eftir því að vita meira er óslökkvandi
og við erum ákveðin í að gera betur en síðast.

lokapunkturinn, að minnsta kosti í bili í þessum hóp okkar, var í dag.
fyrirlestur.
30 mínútum síðar, þegar við höfðum flutt fyrirlesturinn, svarað spurningum og fengið okkur sæti aftur, varð mér litið á félaga mína...
þrír þumalputtar upp í loft, bros út að eyrum og geislandi augun
-þrír stúdentar í sjöunda himni-

frábær tilfinning....

morgunmatur

2007-05-26T10:53:00.000-01:00

Einn morguninn, fyrir stuttu, var ég eitthvað svoooooo sofandi eftir 5 tíma nætursvefn (amm, ég veit, stutt)....að þessi þarna endalaust geispandi stúlka gat örugglega ekki með nokkru móti talist vera vakandi.

Og hvað gerir maður í svona ástandi?

Snickers og kaffi var valinn álitlegast morgunverðurinn. Og það vakti sko stúlkugreyið :D

Ekki skil ég samt hvernig mér tókst að borða þetta í morgunmat....verður hálfflökurt bara við tilhugsunina. Sem minnir mig á eina litla sögu....einu sinni var lítil stelpa sem vildi alveg endilega borða gúrkubita með smjöri í morgunverð (ekki skil ég af hverju, en það er annað mál....mörg ár síðan). Þessi líka svaðalega gúrku-smjörs-blanda fór eitthvað illa í mallakútinn, þannig að smá seinna endaði gúrku-smjörs-blandan hálfmelt á gólfinu....og amm, þarf líklega ekki að spyrja að því, af einhverjum ástæðum hefur mig ekki aftur langað í gúrkubita með smjöri í morgunverð :o)

haustdagur

2007-05-21T06:57:00.000-01:00

það er haust í Melbourne....
trén hafa dreift laufblöðunum sínum út um allar götur og þau bara liggja þarna. Það er haust í marga daga, ekki bara ca einn dag einsog á Íslandinu. Laufblaðahrúgur á gangstéttum, maður kemst ekki hjá því að vaða laufblöð á leiðinni heim. Það er eitthvað heillandi við þetta margra-daga-haust. Og þar sem ég er svo heilluð af haustinu, tók ég upp eitt af þessum milljón laufblöðum sem voru að hvíla sig á gangstéttinni. Kom því vel fyrir undir góðum stafla af skólabókum.
Einn daginn fer þetta laufblað svo í ramma, undir gler og upp á vegg. Til að minna mig á fallega haustið í Melbourne.

eða.....kannski er bara kominn vetur?
Að minnsta kosti hefur ekki veitt af úlpu undanfarið og vettlingar hafa fengið að fljóta með. Er stundum skrambi kalt í þessari borg. Og á morgnana kemur ískaldur blástur inn um gluggann, sem er reyndar mjög frískandi.

haustvetur - er það ekki bara? :D

Dagurinn í dag, hálfdrungalegur eitthvað. Held að þessi gráu ský skýri það, kannski líka rigningin.
Labbaði mér inn á kaffihús. Keypti uppáhaldskaffið og labbaði mér upp á efri hæðina. Þægileg tónlist á fóninum. Fór úr úlpunni og tyllti mér í stóran, mjúkan stól. Hef lært af reynslunni, að bíða í doldinn tíma.....því annars er kaffið alltof heitt. Á meðan kaffið var aðeins að kæla sig, varð mér litið út um gluggann; tré, með örfá laufblöð sem bærðust til í sunnangolunni. Lítil hús í viktorískum byggingarstíl og málningin aðeins farin að flagna af þeim. Skemmtileg andstæða við skýjakljúfana. Sporvagn sem rennur eftir teinunum sínum. Melbourne, borgin sem mér þykir svo undurvænt um.
Og næsti sporvagn rennur hjá. Rennur áfram svipað og námið mitt; mastersgráða í höfn, að öllum líkindum, eftir örfáa daga.

Kaffið búið að ná drykkjarhæfu hitastigi......ahhh....hvað kaffisopinn getur nú verið góður.
Það er eitthvað svo mikil kyrrð og værð í loftinu. Kannski hefur djassinn hennar Holiday sem er á fóninum þessi áhrif, eða kannski er það bara haustið....það er að minnsta kosti einstaklega slakandi að tylla sér svona við gluggann og horfa út. Horfa á húsin, mannlífið, borgina.

Rölti mér út í heillandi haustið.
Taka-með kaffið kemur með á fundinn sem byrjar klukkan fjögur.

afi minn

2007-05-07T09:54:00.000-01:00

Hann afi minn kvaddi á sunndaginn.
Ég skil það vel að það hafi verið kominn tími á hvíld eftir 94 ár.

Afi gerði góðan steiktan fisk og besta hrísgrjónagraut sem ég hef fengið. Afi sagði reyndar ekki hrísgrjónagrautur - hrísgrjónagrauturinn hans afa míns hét vellingur og var sá besti sem ég hef fengið.

Ég man eftir afa mínum ein jólin, jólaplata á grammafóninum og hann tók nokkur létt dansispor á stofugólfinu - brosandi sínu innilega brosi á meðan og augun leiftrandi af ánægju.

Þónokkrum sinnum var afi í tröppu, með málningarfötu og pensil í hönd. Hann var jú málari. Stundum var hann líka að bora eða negla nagla í vegg. Þegar hann varð eldri, varð pensillinn fínlegri og fallegustu málverk litu dagsins ljós. Ekki bara málverk, líka fegurstu hlutir úr leir.

Það var svona smá bretti sem afi setti stundum út á altan. Þetta var til að litlu fuglarnir yrðu ekki svangir í vetrarkuldanum.

Afi talaði voða lítið um starfið sem hann og amma áttu með þroskaheftu krökkunum. Ég held það hafi verið því það eru varla til orð til að lýsa slíkri upplifun eða slíkri góðvild.

Lítil snót sat ósjaldan í fanginu hjá afa sínum og þau skáru saman út laufabrauð, jólaöl í stóru glasi og svo lítið glas með malti og appelsíni. Kirkja, bóndabær og stafurinn minn og stafurinn hans litu dagsins ljós. En afi, voru eitt eða tvö lauf í krossinum á kirkjunni?

Man líka eftir lítilli snót, kannski fimm ára, sem hélt í traustu og sterklegu höndina hans afa síns og saman röltu þau út í bakarí að kaupa bakkelsi. Einhvern veginn fór það oft þannig, eftir gönguferðirnar okkar í bakaríið, að það birtist snúður með súkkulaði á eldhúsborðinu. Kókómjólk í fernu eða glasi og snúður með súkkulaði - litla stúlkan alsæl hjá afa sínum og ömmu.

~takk~

obbosí

2007-04-28T07:54:00.000-01:00

Obbosí...heldur betur kominn tími á blogg!

Einhvern veginn svona hefur tilveran verið undanfarnar vikur...
Fyrir páska; skóli.
Páskar; súkkulaði, súkkulaði og skóli.
Eftir páska; skóli.
Horfur næstu vikna; skóli.

En alveg ofsalega gaman að læra/lesa þetta allt saman! Um alls konar örverur í matvælum, árangursstjórnun og svo almenna stjórnun. Akkurat núna er fókusinn á örverur í víngerð og svo stjórnun í fyrirtæki í Suður-Kína - svaka gaman að lesa um kínverska menningu, kínversk gildi osfrv. Er ekki frá því að mig langi barasta mikið mikið mikið að fara aftur til Kína :o)

breyttir tímar

2007-03-27T03:23:00.000-01:00

Það eru svo sannarlega breyttir tímar í Melbourne, klukkunni var nefnilega breytt a sunnudaginn. Þannig núna er Melbourne 10 klukkustundum á undan Íslandi.

Skólalífið gengur annars sinn vanagang og það er mjög gaman. Við erum þrjú saman í liði, búin að skrifa smá ritgerð og smella saman fyrirlestri. Afhendum ritgerðina og flytjum fyrirlesturinn í dag. Ákváðum að gera þennan fyrirlestur smá öðruvísi, hluti af því er að við verðum öll í svipuðum fötum (gallabuxur og svartur efrihluti). Teljum að þetta atriði endurspegli sterka liðsheild og samheldni sem hefur vissulega haft áhrif á þróun mála í þessu verkefni.

Þetta lið hefur verið þroskandi og lærdómsríkt á marga vegu - og líka mjög skemmtilegt.

Hey, meðan ég man....prófaði að elda eitthvað sem ég hef aldrei kokkað áður.
Og það var.....
dadarammm.....

Smokkfiskur einn daginn og svo sverðfiskur!

Bæði tókst vonum framar. Leist reyndar ekkert á smokkfiskinn fyrst, var doldið slepjulegur. Spurning hvort hann ætti að fara í ruslið eða á pönnuna....en ákvað að smella ´onum á pönnuna ásamt fiskisósu, lauk og papriku. Varð bara alveg ágætt og smokkfiskurinn var ekkert seigur.
Sverðfiskurinn var líka mjög athyglisverður....eins og ljós útgáfa af túnfiski, já kjötkenndur. Ljúffengur sverðfiskur, steiktur á pönnu með smá sítrónupipar og líka mjög góður með smá teriyaki sósu. Meðlætið var kúskús með vorlauk, kúrbít, papriku og strengjabaunum og svo avocado-mauk. Nammi nammi namm :D

skólalíf

2007-03-19T10:09:00.000-01:00

eeeeennnnn.....
iiiiiiiiiinnnnnn.....
eeeeennnnnnnn......

svona hljóð berast inn í íbúðina á laugardagsmorgni....hvað er eiginlega í gangi??
aha, Formúlan byrjuð!

Engin ástæða til að vera niðri í bæ að horfa á, þegar maður getur verið heima hjá sér að HLUSTA á, hehe :o) hver er líka munurinn, bílarnir keyra svoooo hratt að ég stórlega efast um að áhorfendur niðri í bæ sjái þá mikið.

hvað er svo að frétta?
B.......Æ........K..........U.........R
S.......K.........Ó...........L.........I
já, og verkefni

Rétt áðan var ég að vinna á skólatölvu og hún krassaði. Voða gaman. Krassaði með stæl og ákvað að henda öllum gögnunum mínum svona í leiðinni. Veit ekki hvort ég á að hlægja og brosa að eigin hrakförum eða hágráta. Vona bara það sé til afrit einhvers staðar í þessu risavaxna tölvukerfi...og að það afrit finnist mjög fljótlega.

Horfði annars á einn kennarann minn fá taugasjokk yfir tölvu í tíma. Mér fannst það smá fyndið, sjá hvernig kennarinn hegðaði sér fyrir framan heilan sal af nemendum - horfa á hana bókstaflega lemja tölvuna. En fann líka til með henni, þannig ég rétti henni hjálparhönd til að fá tæknina til að virka. Amms, matvælafræðingurinn kann nú sitthvað fyrir sér, ha ;o)
hins vegar hef ég ekki hugmynd um hvernig öll skjölin mín geta birst aftur....

fólk

2007-03-12T04:32:00.000-01:00

Var í smá hópvinnu áðan....skrifuðum niður styrkleika, veikleika, tækifæri og ógnanir hvers einstaklings í hópnum og ræddum þessa þætti opinskátt. Í upphafi var helmingur hópsins smá tregur til að ræða þessa þætti, en eftirá vorum við sammála um að þetta hefði verið virkilega gott. Þetta losaði einhverja ósýnilega spennu og óvissu sem oft er í nýjum hóp. Núna liggja spilin á borðinu og við vitum ögn meira um meðlimi hópsins, hvernig við getum best unnið saman með því að nýta veikleika og styrkleika hvers annars.

Sumum reyndist erfitt að finna veikleika við sjálfan sig. Og skiljanlega, það getur verið erfitt að viðurkenna og horfast í augu við eigin veikleika, játa að maður sé ekki fullkominn. Önnur ástæða gæti verið að fólk hefur hreinlega ekki leitt hugann að því hvaða veikleika það hefur. Sumum reyndist erfitt að finna styrkleika við sjálfan sig, kannski af því þeir sjá sig í neikvæðu ljósi. Eða að viðkomandi hafði aldrei spáð í því í hverju hann sé góður. Tjahh, eða einhver enn önnur ástæða.

Málið er að við settumst niður, komum þessum þáttum niður á blað. Öflugt að kortleggja eiginleika hópsins og sjá þessa eiginleika á blaði - áttuðum okkur á því að við eigum margt sameiginlegt og erum líka ólík að ýmsu leyti. En saman, með því að spila inná veikleika og styrkleika, munum við ná að leysa verkefnið sem liggur fyrir, virkilega vel.

Hópurinn samanstendur af fjórum einstaklingum sem koma frá Íran, Kína, Víetnam og svo Íslandi. Húðin okkar er ekki eins á litinn, heldur ekki hárið og móðurtungumálin eru fjarskalega ólík. Vissulega er enskukunnáttan misjöfn og stundum finnum við ekki réttu orðin. En einhvern veginn náum við að skilja hvort annað, vinna saman og hlægja saman. Ég fagna fjölbreytileikanum í hópnum, fjölbreytileikinn bíður uppá að fá fram ólík sjónarhorn - það þroskar mig, hina aðilana í hópnum og víkkar sjóndeildarhringinn.

hægriflugur

2007-03-10T04:06:00.000-01:00

Ekki hafði mér áður dottið í hug að flugur gerðu mun á hægri og vinstri.
Þessar flugur sem hafa komist í nálægð við minn kropp hafa allar verið hægrisinnaðar, að minnsta kosti hafa þær bara séð erindi til að narta í hægri hlið líkamans. Eða voru þær kannski vinstrisinnaðar, hægri hliðin mín hefur jú verið vinstra megin (séð frá flugunni sko) þegar þær komu fljúgandi. Hhmmm... :D

Annars líst mér mjög vel á þessa önn í skólanum. Hellingur að gera, skilaverkefni í hverri viku og líka smærri verkefni. Einsog áður er töluverð áhersla lögð á hópavinnu og ég hlakka til þess að kynnast tveimur hópum í viðbót :o)

Jæja, ætla fara snúa mér að skólabókunum....þessum x fjölda sem bíður þess að verða lesinn.

þegar heitt er í veðri....

2007-03-02T06:28:00.000-01:00

....finnst mér rosa gott að borða sjávarréttasalat í kvöldmat :o)

Vil gjarnan deila þessu nammigotti með þér, þannig að hér er´edda

1 haus af því salati sem þér finnst vera best
nokkrir kræklingar
nokkrar risarækjur
lime safi
krydd eftir smekk (td koríander, hvítlaukur og engifer)
vatn

Skera salatið niður. Setja pínku pons af vatni í pott, ásamt kryddinu og limesafanum. Sjóða kræklinginn og risarækjuna þangað til tilbúið. Smella sjávardótinu yfir salatið, ásamt soðinu.

Rosa gott að hafa ristaðar furuhnetur oná salatinu eða stökkar ostastangir með.

~NJÓTTU~

Melbourne á ný

2007-02-28T03:57:00.000-01:00

Mætt aftur til Melbourne!

Hvað hefur nú gerst síðustu vikurnar....tjahh....alveg heill hellingur af skemmtilegum upplifunum!

F&F (fjölskylda og félagar). Stórfínt að kíkja í heimsókn til Íslands, hitta fjölskyldu og vini.
Vinna (vína, haha :o) ). Var svo lánsöm að vinna á virkilega góðum stað, með frábæru fólki, lærði meira um bjór og vín.
Vatnið. Var dugleg í ræktinni, rosa gaman.
Maturinn. Borðaði ofsalega góðan mat á hverjum degi (takk Siggi kokkur!!). Slátur komst svo nokkrum sinnum í mallakútinn - naaaaaammm :o) Naut þess að drekka kókópókó (kókómjólk) í lítravís, kókómjólkin hérna í Melbourne er nebbla ekkert spes. Kókóbanó (kókómjólk og banani) var líka kærkominn millibiti, bananar fengust nebbla ekki í Melbourne því bananatrén uppi í Queensland skemmdust í einhverjum fellibyl. Ef bananar fengust, var kílóverðið nálægt því sem góð nautasteik kostaði, amms, alveg skýjahátt.
Veðrið. Vindurinn, rigningin, fagurblá fjöllin. Naut þess að sjá fjöllin nálægt Reykjavík, fagurblá og flott. Hélt ég myndi hins vegar aldrei segja að vindurinn og rigningin væru æði. En það gerðist. Vindurinn var svo ferskur og rigningin svo góð. Kannski af því það kemur mjög sjaldan virkilegt rok í Melbourne, hvað þá að það rigni.
Píla. Yndislegasti hundurinn, skemmtilegur félagi sem er endalaust forvitin. Píla er líka virkilega góð fyrirsæta, náðust nokkrar frábærar myndir af henni þar sem hún hvíldi lúin bein á dyramottunni heima.

Eftir eitthvað um 40 klukkustunda ferðalag (Keflavík-Frankfurt-Singapore-Sydney-Melbourne), lenti hnátan í Melbourne. Missti reyndar af fluginu frá Sydney til Melbourne, tók bara annað í staðinn sem fór örlítið síðar.

Rölti gegnum Vic Market um daginn, og já það var svo sannarlega ánægjustund. Labbaði þarna um, brosandi út að eyrum, af einskærri gleði. Ávextir, grænmet, kjöt fiskur, bakkelsi -öllu svo smekklega raðað upp og góðlátleg sölumennskan í fyrirrúmi. Þéttur karlmaður hrópar verðið á tómötunum, á næsta bás er eldri kona og gamli maðurinn hennar að selja nýbakað brauð. Og svo þar við hliðina eru konurnar með léttliðaða hárið, hjá þeim er hægt að kaupa tyrkneskan Borak (heitt brauð með fyllingu innaní, alveg ossssalega gott :o)

Blindi söngmaðurinn var svo á sínum stað, í gítarboxið sem lá hjá honum voru komnir nokkrir dollarar. Hann söng svo undurfagurt með hljómmiklu röddinni sinni - og hjartað mitt söng með af einskærri gleði.

Kíkti svo líka í súpermarkaðinn, vantaði mjólk í litla ísskápinn heima.
Gæinn á kassanum: Nei, sæl! Langt síðan ég hef séð þig, hefuru verið í fríi?
Varð ekki lítið hissa við þetta tilsvar. Í fyrsta lagi hef ég ekki komið þarna síðan í desember. Og, af öllum þeim þúsundum sem koma hvern einasta dag í þennan súpermarkað, mundi gæinn eftir stúlkunni. Jahá, fólkið í Melbourne er sko aldeilis vingjarnlegt! :o)

Svo er skólinn að skríða af stað, besta mál. Fyrsta daginn þurfti að ganga í að klára smá pappírsmál, þannig ég kíkti við hjá þægilegu skrifstofukonunni.
Skrifstofukonan: Veistu, er annar Íslendingur í skólanum?
Ég: Nei, allavega ekki svo ég viti til.
Skrifstofukonan: Núúúú, ég hélt hann væri Íslendingur.....oh, hvað heitir hann aftur....Claudio, er það ekki....jú, Claudio.
Ég: Claudio! Jú, ég þekki hann!
Já, félagi frá Íslandi er bara kominn í sama skóla, sama nám og meira að segja sama námskeið. Það gerist stundum að heimurinn snarminnkar á sekúndubroti.

Í stuttu máli: það er ÆÐISLEGT að vera komin aftur til Melbourne :o)

nýtt ár

2007-01-05T13:38:00.000-01:00

Gleðilegt nýtt ár!

og svo mörg voru þau orð...

~gleðileg jól~

2006-12-26T12:05:00.000-01:00

Ágætt að vera komin til Íslands. Hitta vini og ættingja, njóta jólanna. Opna pakka. Fullt af góðum mat, hamborgarhryggur og meiri hamborgarhryggur......jú, og hangikjet líka. Jólabland, laufabrauð, konfekt og smákökur. Svo matarboð daginn út og inn. Smjattað á afgöngum af góðgætinu þess á milli.

Og súpa meira malt og appelsín, skál og gleðileg jól!

sjáumst

2006-12-09T02:38:00.000-01:00

Síðustu dagarnir í Melbourne, í bili. Kem nú aftur í feb...
Fer úr borginni á morgun, tek þátt í smá dæmi, flýg svo til Íslands og lendi að kvöldi 18. desember. Fínt, rétt mátulegt fyrir jólin :o)

Sjáumst!

jólahvað?

2006-12-05T03:15:00.000-01:00

Sandalar
Stuttbuxur
Hlýrabolur
Sólgleraugu
Sólarvörn

Hver spáir í jólunum í þessu samhengi?
Amk ekki ég!

Jólasveinar, jólalög og jólaskreytingar eru í hrópandi ósamræmi við sandalana og sumarútbúnaðinn. Ferlega undarlegt að horfa á smá jólasýningu í steikjandi hita. Mikið skrítið að heyra jólalög í flestum búðum. Jólamaturinn í búðunum, alls konar gúmmelaði. En smá pæling....hver hefur lyst á massífri jólasteik eða svaka jólaávaxtaköku í þessum hita? Ekki ég....íííískaldur ávaxtahristingur, amm, það er nær lagi :o)

Smá punktur sem er einnig í hrópandi ósamræmi við aðstæður á Íslandi: Í Ástralíu geysa núna mestu þurrkar í áraraðir. Til dæmis hefur ekki rignt í Melbourne í næstum hálfan mánuð. Blóm í görðum fólks eru visin. Grasið er ekki grænt, það virkar hálfdautt. Grábrúnt einhvern veginn á litinn. Það eru hömlur á vatnsnotkun (en gengur erfiðlega að fá fólk til að fara eftir þeim).

Hlakka ekki til að fara úr yndislega, hlýja sumrinu.
En verður fínt að komast úr vatnsskortinum.

Williamstown

2006-12-01T01:44:00.000-01:00

Fór með vinkonu til Williamstown í gær. Sætur, krúttilegur hluti af Melbourne. Feeeerlega rólegt þarna!

**gamlir bílar í Williamstown**

Smjöttuðum á tælenskum mat í hádeginu, nammi nammigott. Var sko ekki arða eftir á diskunum. Röltum um Williamstown og nutum lífsins. Sólin skein eins og hún mögulega gat og vindurinn blés hressilega allan daginn. Minnti eiginlega óþægilega mikið á íslenska rokið!

**stelpan við sjóinn**

Tókum svo lítinn bát til baka til Melbourne. Varð óvænt blautbolakeppni, jebb....urðum gjörsamlega reeeeennblautar af sjónum sem gusaðist yfir okkur hvað eftir annað.

Nokkrar myndir af þessu litla ferðalagi er að finna á myndasíðunni. Enjoy!

loksins - blogg :o)

2006-11-25T03:45:00.000-01:00

Obbosí....heldur betur kominn tími á blogg!

Undanfarnir dagar hafa verið mjög skemmtilegir, enginn skóli. Einungis hið ljúfa líf dag eftir dag eftir dag. Njóta vinanna, sumarsins og lífsins. Held að nokkrar myndir lýsi þessu miklu betur....

Okkie, Gowri og Katrín á Hispanic Fiesta. Mikið stuð og enn meira um kvöldið. Dúndrandi salsatónlist út um allt.

Smakkaði þetta (churros, er súkkulaðifyllt og djúpsteikt), namminamm :o)

Eftir Hispanic Fiesta, var Pannacotta heima hjá Okkie....

....og líka heimagerð gulrótarkaka, mmmm :o)

Camillu og Gowri fannst gaman heima hjá Okkie....

og já, það var gaman...

sko rosa gaman!

Fór á grískan veitingastað með félaga mínum. Þetta var forrétturinn. Saganaki (haloumi)-steiktur ostur, NAMMM!

Hann sagði eitthvað fyndið og vatnið frussaðist næstum því út úr munninum :P

Löbbuðum á kínverskan stað sem er nálægt. Alls konar gufusoðið dæmi þar í gangi. Þarna var eftirrétturinn gripinn, egg custard bun. Ansi gott.

Og svo var brugðið á leik með myndavélina.

Eitt kvöldið var farið á Fish & Chips stað niðri á strönd. Pakkningarnar utan um matinn voru voða fansí, verið að líkja eftir því hvernig þetta var í gamladaga (pakkað í dagblöð). Djúpsteikur hákarl, djúpsteikt kartöflukaka, djúpsteiktir calamari hringir og djúpsteikt dim sum. Og auðvitað djúpsteiktar franskar kartöflur. Ferlega steikt máltíð eitthvað! :o)

Maður verður víst að setja sítrónu út á herlegheitin...

Og einn daginn var vodkafyllerí! Var nú reyndar bara vatn í þessari vodkaflösku, hehe :o)

sumar/jólafrí

2006-11-16T07:23:00.000-01:00

Jæja já, þá eru prófin búin og sumar/jólafríið tekið við. Voða ljúft, get ekki sagt annað :o)

Fyrsti sumarfrísdagurinn byrjaði reyndar ansi ósumarslega. Á hádegi var dimmt heima hjá mér, himinninn var fullur af ofurgráum skýjum. Stuttu síðar varð enn dimmara og byrjaði smá hávaði. Hvað gengur eiginlega á??
Ótrúlegt en satt, það var HAGLÉL! Og akkurat á þeim tíma, samkvæmt gæjanum í útvarpinu, var 10 stiga hiti í Melbourne. Rigndi svo og rigndi og rigndi og var skítakuldi. Kaldur, kaldur sumardagur.

En nóg af þessu, yfir í stemmningu dagsins.
Í miðbæ Melbourne er þónokkuð af litlum húsasundum, eru svona eitt af aðalsmerkjum borgarinnar. Stórar götur, minni götur og svo þessi litlu húsasund inn á milli. Getur orðið fínasta völundarhús fyrir fólk sem á það til að tapa áttum.
Maður gæti freistast til að halda það að þessi húsasund væru ferlega ómerkileg og ekkert þar að finna. En raunin er þveröfug, í Melbourne eru litlu húsasundin ansi lífleg. Verslanir, veitingastaðir, kaffihús, bókabúðir og trúbadorar spilandi á hin ýmsu hljóðfæri. Fátæklingar, viðskiptalið, nemendur og öll flóran eiga leið hjá.

Átti leið inn í eitt þessara litlu húsasunda í dag, nýtti tækifærið og kíkti inn á eitt minnsta kaffihús sem ég hef nokkurn tímann séð. Ætli svæðið fyrir viðskiptavinina og kaffibarþjóninn hafi náð 20 fermetrum? Allavega, á þessum litla fleti rúmuðust fimm agnarlítil borð þétt upp við hvort annað og svo fyrir framan þau sveif ítalski kaffibarþjónninn um gólf. Ferlega kósí. Inn á kaffihúsið komu nemendur, skrifstofudömur, viðskiptamenn og kaffibarþjónninn heilsaði flestum með nafni. Tylltu sér niður yfir girnilegu brauði eða gripu coffee-to-go. Og þegar nemendurnir, skrifstofudömurnar eða viðskiptamennirnir fóru, sögðu þau "thanks, see you tomorrow" við kaffibarþjóninn. Algjör smábæjarfílingur í borginni, yndislegt.

Gæddi mér á dýrindis tyrknesku brauði með spínati, fetaosti, tómötum og grilluðu eggaldini. Gluggaði í ókeypis borgarblað og naut upplifunarinnar, lífsins.

brrrrr [kalt].....veðurspáin

2006-11-11T03:51:00.000-01:00

Kikkaði á mbl.is og þar stóð þetta:

"Veðurhorfur næsta sólarhringinn
Viðvörun: búist er við stormi fyrir norðan og austan land.
Spá: Hvöss norðan- og norðvestanátt með snjókomu eða éljum N- og A-lands, en lægir smám saman og léttir til í dag, fyrst um vestanvert landið. Frost 0 til 10 stig, kaldast í innsveitum í dag. Vaxandi SA átt og þykknar upp vestantil í kvöld. "

En girnilegt :S

Og áfram heldur góðgætið...

"Veðurhorfur næstu daga
Suðaustanslagviðri S- og V-lands með slyddu og síðar rigningu á sunnudag en snjókomu NA-lands. Hlýnar í veðri. Norðaustan hvassviðri á mánudag og þriðjudag með snjókomu á norðanverðu landinu. Kólandi. Áframhaldandi norðanátt með éljum á miðvikudag og fimmtudag og frost um allt land. "

Það er ekki laust við að það sé kominn nettur kvíði í kroppinn fyrir því að fara í þennan kuldabola sem er í henni Reykjavík.

jibbíí, bara eitt eftir!

2006-11-08T00:59:00.000-01:00

JESSS, þá er þetta próf búið og bara eitt eftir.
Skák og mát og megi einkunnin verða góð :o)

Rétt tæplega vika í síðasta prófið...

að ferðast

2006-11-03T05:56:00.000-01:00

Þegar maður á að vera læra.....vill hugurinn svo gjarnan fara í smá ferðalag. Ferðalag til allra heimsins landa, Nýja-Sjálands, Nígeríu, Indlands, Indónesíu og Bandaríkjanna. Fara aftur til Namibíu og Kambódíu. Tékka á Búrma, Laos. Líka Búlgaríu og Bólivíu. Sjá meira af Asíu. Og Suður-Ameríku, á hana alveg eftir. Langar líka til Afríku og sjá meira af Ástralíu. Og....Og.....Og.....Og ég vildi að ég hefði heila sundlaug af peningum til að gera þetta allt! hehe :o)

Og þegar félagarnir eru við það að leggja í svaka ferðalög og aðrir að plana.... eykur það bara enn meira á löngunina.
Það er svona að hafa þennan Bacterius ferdalangus.

Þessa dagana er alveg óendanlega skemmtilegt að tylla sér niður með góðum félaga, deila upplifunum úr ferðalögum, skoða myndir úr ferðalögum, spjalla um ferðalög og allt á milli himins og jarðar. Þetta er reyndar gaman alla daga, en sééérlega gaman þessa dagana. Held það beri vott um smá prófstress.

Vic Market

2006-11-01T01:13:00.000-01:00

Á heima rétt hjá Victoria Market, sem er einn af helstu mörkuðum Melbourne. Þetta er markaður þar sem er hægt að kaupa alls konar dóterí (föt, glingur, ...) og líka grænmeti, ávexti, kjöt, fisk, brauð, sætabrauð, vín og osta. Þegar ég labba í skólann, labba ég í gegnum markaðinn. Mér finnst það yndislegt, frábært. Held ég elski barasta Vic Market.

"Jarðarber á dollara!" glymur við frá einum sölumanninum, hann er svona í þéttari kantinum og með styrka rödd. Sölukona örlítið frá hefur líka sterka rödd og gnæfir yfir "eitt kíló af kirsuberjum á sex dollara, eitt kíló af kirsuberjum á sex dollara!" Stundum er mikill bardagi hjá sölumönnunum, stundum er verslunin hljóðlátari. Og fólk röltir um markaðinn með verslunarkerrurnar sínar troðfullar af gulrótum, tómötum, blaðgrænmeti og alls konar góðgæti. Gæðir sér svo kannski á litlu núgatstykki eða súkkulaðibitaköku frá sætabrauðssalanum. Rétt hjá stendur blindur maður, spilar á gítar og syngur. Hann hefur svo fallega rödd. Dýrka að heyra hann syngja, gerir alveg daginn fyrir mig.

prófi próf

2006-10-30T04:28:00.000-01:00

Prófatíðin hafin, fyrsta prófið var í dag. Eru alveg ágætlega vel dreifð, um vika á milli þessarra þriggja prófa sem liggja fyrir. Úff maður....mikið rohosalega hlakka ég til 14. nóvember! (síðasta prófið er sko þann dag).
Annars er lítið þannig séð að gerast akkurat núna, félagslífið í lágmarki, allir í prófum. Lífið er að lesa, borða, hreyfa sig og sofa. Og svo nottla dreifa huganum smá svona af og til...núna er td. tilvalin stund að rifja upp brot af "smá" ferðalagi...er haggi? :o)

<>*<>*<>*<>*<>
Sandalda og skór, Namibíu<>*<>*<>*<>*<>Hús og tré, Suður-Afríku
<>*<>*<>*<>*<>
Lítill drengur, Tælandi <>*<>*<>*<>*<>*<>*<>Taj Mahal, Indlandi

Mmmm....yndislegar minningar :o)
Jæja, er víst stödd í Melbourne og þarf að fara læra. Adios!

"sail away from the safe harbour"

2006-10-26T08:37:00.000-01:00

"Twenty years from now on you will be more disappointed by the things you didn't do, than by the ones you did do. So throw off the bowlines. Sail away from the safe harbour. Catch the trade winds in your sail. Explore. Dream. Discover."
Mark Twain

~þessi tilvitnun hitti mig gjörsamlega~

nýttu tækifærin, kannaðu nýjar slóðir, uppgötvaðu. það getur þurft hugrekki til að fara ótroðna slóð eða breyta. en mikið rosalega getur það verið þroskandi og fyllilega þess virði.

eldur

2006-10-24T01:30:00.000-01:00

Stödd á 13 hæð í skólanum. Fann einhverja smá skrítna lykt, minnti á lyktina þegar saltsýra er hituð. Svona mjög óþægileg, nett ertandi lykt. Brunakerfið vælir og vælir og vælir. Ætti að koma mér út, líst ekki alveg á blikuna - þessi lykt á ekki að vera hér. Fólk í kring virðist ekkert kippa sér upp við vælandi brunakerfið. Maður hugsar nefnilega ansi oft, æi, þetta er ekkert. En lyktin, hugsa ég....það er eitthvað ekki eins og það á að vera. Strákur sem kemur aðvífandi segir "you should get out, there is a fire on a floor below"

Finn næsta stigagang, labba rösklega niður. Þessi vonda, ertandi lykt verður verrri og verri því neðar sem maður fer. Á áttundu hæð er fýlan nokkuð sterk, það hefur greinilega eitthvað gerst. Set flíspeysuna (já, flíspeysu....það var kaldur dagur í gær!) fyrir nef og munn, gerir það aðeins betra að anda. Frekar óhuggulegt að vita maður sé að labba í áttina að eldi eða einhverju efnaslysi. Vildi koma mér rösklega út.

Slökkviliðið bíður fyrir utan bygginguna, það var víst eldur í kjallaranum.

Jájájá, alltaf líf og fjör í skólanum!

En þetta minnir á aðra upplifun....heimsreisuna ;o)

Tvær stelpur voru staddar í Þýskalandi, bíða eftir flugi til Suður-Afríku. Doldil bið eftir fluginu....fínasta hugmynd að fara í sturtu og fríska sig aðeins, maður getur orðið svo sjúskaður eitthvað á þessum blessuðu flugvöllum og hva, 12 tíma flug eða eitthvað þannig framundan. Ljúf sturta, frískandi og góð. En hvað gerist þegar stelpan er á evuklæðum? Kom sprengjuhótun eða eitthvað, rýma svæðið. Einn tveir og drífa sig í fötin og út!

Hefur örugglega verið doldið fyndið að sjá eina stelpu labbandi um svæðið með rennandi blautt hár, úfið í allar áttir....hehe :o)

stödd á Indlandi!!

2006-10-22T07:57:00.000-01:00

Svona næstum því....

Síðasta föstudag var haldin Diwali hátíð á einu helsta torgi Melbourne. Þetta er indverskt hátíð. Og auðvitað fór menningarforvitna ég á svæðið!

Hefði alveg eins getað verið stödd á Indlandi. Af hverju?
Fyrir það fyrsta var hriiikalega mikið af fólki þarna, eiginlega bara Indverjum. Jú, og svo var eitt endurskinsmerki (jamm, hvíta hvíta stelpan) þarna í miðjum hópnum...hehe :o)
Ef maður vildi hreyfa sig á annan stað þurfti að reyna troðast á milli fólks og það var varla hægt. Segja sorry, sorry á leiðinni til að fólk færði sig um þessa 5 cm sem það kannski gat fært sig. Svo var líka...

-indversk tónlist
-fólk á öllum aldri, afar og ömmur, ungabörn og allt þar á milli
-indverskur dans, bæði á sviðinu og hjá áhorfendum
-indverskar konur, voða voða fínar í litskrúðugum sarí eða punjabi fötum
-indversk matarlykt
-indverskir menn, voða fínir í indverskum fötum

Litskrúðugt er sko alveg orðið yfir indverksan klæðnað; gult, rautt, blátt, alls konar munstur....svo fallegt, svo flott.

hafragrautur

2006-10-18T07:06:00.000-01:00

ÓGEÐ!

Það hefur mér allavega fundist hingað til. Eða svona...

þegar ég var hva, kannski 4 eða 5 ára var ég hjá dagmömmu. Það var hafragrautur á morgnana hjá dagmömmunni. Mér fannst hafragrautur alveg herfilega vondur. Píndi þetta sull upp í munninn og reyndi svo að kyngja. Erfiðast að kyngja, mér fannst þetta svo mikið ullabjakk. Klígjaði alveg við þessu. En aldrei kvartaði ég við dagmömmuna, hún gerði nefnilega oftast mjög góðan mat. Maður reyndi nú líka að vera stillt og prúð stelpa, vera ekki að kvarta mikið eða viljandi að skapa vandræði. Einn daginn spurði dagmamman svo mömmu hvort ég ætti við einhver vandamál að stríða í hálsinum, því ég væri svo lengi að kyngja.

Og þá kom það upp úr hnátunni. Mér finnst hafragrautur vondur.

Og þannig hefur það verið. Hafragrautur fer helst ekki inn fyrir mínar varir - þangað til fyrir stuttu. Námsmanninum blöskraði verðið á morgunkorni í búðinni, líka jógúrtinni. Ofan á það var mín orðin þreytt á þessu þurrfæði. Breyta, breyta, finna eitthvað nýtt.

Skoðaði hillurnar smá, las innihaldslýsinguna. Nei sko, þetta gæti bara verið gott. Hafragrautur með oggupons af salti, nokkrum döðlubitum, smá slurk af sírópi og svo sojamjólk útá. Líka gott að setja epli út í.

NAMMI NAMMI NAMMI NAMMMMMMIGOTT :o)

alveg frááábært!

2006-10-16T03:31:00.000-01:00

Viðburðurinn síðasta föstudag byrjaði fínt; boðið upp á fingramat, bjór og vín. Fólk bara að spjalla og svona (á meðan sumir voru smá stressaðir!)

700 manns í salnum.
Og mín stóð á sviðinu og babblaði eitthvað á ensku. Ótrúleg upplifun, magnað, frábært!
Hef oft verið á sviði, en aldrei talað fyrir framan svona mikið af fólki. Var einhvern veginn miklu minna mál en ég hafði haldið. Salurinn var nefnilega myrkvaður, þannig maður sá bara fyrstu tvær sætaraðirnar og svo var bara myrkur. Aha, made things a little bit easier ;o)

Ljósmyndataka af verðlaunahöfunum og fólkinu sem talaði á sviðinu. Hersingin labbaði smá spotta á bar þar sem svipað hélt áfram; boðið upp á fingramat, bjór og vín eins og maður gat í sig látið. Skál skál, glæsilegt, til hamingju. Spjalli spjalli. Skemmtileg dansitónlist og fólk að tjútta. Stelpur í kjólum, algjörar ´ladies´. Strákarnir í jakkafötum og algjörir herramenn. Dansað fram á nótt....heita sumarnótt.

Mikið rosalega var þetta skemmtilegt kvöld :o)

sumardagur

2006-10-12T08:26:00.000-01:00

Jæja já....ætli sumarið hafi komið í dag?

Nei, maður bara spyr. Núna, kl 7:25 að kvöldi, er 33 gráðu hiti.
Og var meira í dag. Var varla hægt að vera þar sem sólin skein, skugginn var miklu betri staður. Hitinn í dag var eiginlega of mikið af því góða.

Ég held það verði bara fínt að koma til Íslands yfir jólin og kæla sig aðeins :o)

700 manns

2006-10-09T08:00:00.000-01:00

Á föstudaginn verður þessi viðburður.

Þessi viðburður er til að þakka sjálfboðaliðum í skólanum. Einnig til að veita krökkum í LEAD og SLP prógrömmunum viðurkenningar og verðlaun fyrir framúrskarandi árangur á ýmsum sviðum. Þetta er svona Óskarsverðlaunaafhending sjálfboðaliðanna. Það er sko dress code. Hún ég tryggði sér nottla pláss á viðburðinum, alltaf gaman að hitta félagana í SLP :o)

Jamm, ég verð viðstödd og meira til. Verðum tvö saman. Félagi minn verður með þeim fínustu á svæðinu (í kjólfötum), held ég verði þá að vera í kjól. Við kynnum og veitum verðlaun.

Það fyrir framan 700 manns!!! Já, 700!

~þetta er einstakt tækifæri~

eins gott að ofnæmislyfið er farið að virka, svona skemmtilegra að hnerra ekki einsog kameldýr í míkrófóninn...

vorboðinn ljúfi

2006-10-08T02:36:00.000-01:00

AAAAAAAtsjúúú....

hnerri hnerri hnerri

lekur úr nebbanum

amm, smá ofnæmi mætt í kroppinn.
Vorið er greinilega komið!

í dag

2006-10-04T03:20:00.000-01:00

Heyrði eitthvað píp um klukkan 7 í morgun. Var svo sybbin að sofnaði bara aftur....

Hrökk upp rétt fyrir klukkan 8, SJITT MAÐUR! Átti nefnilega að vera mætt í skólann klukkan 8:30. Það tekur nokkrar mínútur að

fara í sturtu
tína á sig spjarirnar
skófla einhverju sem heitir morgunmatur í munninn
setja saman hollt og líka gott nesti
klína á sig kreminu sem er í senn ilmvatn - já, sólarvörn!

Trítla í skólann á stuttermabol, sólgleraugu á nebbanum. Ég elska það að geta verið utandyra á stuttermabol fyrir klukkan 9 að morgni! Varð nokkuð heitt á labbitúrnum í skólann, hefði kannski átt að fara í stuttbuxum í skólann....

Akkurat núna, kl 14:41 eftir hádegi, er 28°C hiti hér í Melbourne. Bara fínt, jájá....góður vordagur :o)

þá er það í höfn

2006-10-02T08:53:00.000-01:00

ohhh....rosalega er gott að klára hópverkefni sem hefur verið í gangi undanfarnar 10 vikur. Ekki það að þetta hafi verið eitthvað leiðinlegt, neibb, sko þvert á móti! Kennarinn setti fram sérstætt verkefni, nálgun sem ég hef ekki upplifað áður. Mjög gaman, fræðandi, athyglisvert og þroskandi.

-takk fyrir!

rigning & kaffi latte

2006-09-28T06:42:00.000-01:00

Það var rigning í Melbourne um daginn, alveg heeeeeellirigning.
Og það varð svo mikið myrkur að það þurfti næstum því að kveikja ljós, þó það væri hádegi.
Þá var sko notalegt að vera innandyra......

..... og súpa á einum kaffi latte.

skólafrí

2006-09-25T06:07:00.000-01:00

MMMM.....semester break.....

Þetta annarfrí þýðir 10 daga frí fyrir mig. Allt í einu er fimm daga frí orðið að 10. Ekki amalegt sko! Helgar bætast við báða enda frísins og svo er enginn skóli hjá mér á föstudögum.

´etta er sko næs :o)

grillið

2006-09-22T05:56:00.000-01:00

Jæja já....
þar sýndi stelpan pulsugrillun og pulsusnúning (lært á ónefndri bensínstöð fyrir nokkrum árum).

Símtal í gær:
JT: Hæ Katrín, JúTsjin hér. Hvernig hefuru það?
K: Nei, hæ, JúTsjin. Fínt takk, og þú?
JT: Katrín, ertu upptekin í hádeginu á morgun og seinnipartinn í dag? Er nefnilega að skipuleggja smá SLP grill og vantar sárlega einhvern með mér í innkaupin og aðstoða með grillið.
K: Já, alveg rétt JúTsjin...grillið er á morgun. Ekki málið, get hitt þig kl 3:30 og við getum farið í búðina. Reynum að fá fleiri með okkur.

Grilluðum myndarlega hrúgu af pulsum ofan í SLP félaga í hádeginu í dag. Pulsur, gos, snakk, svangir skólafélagar. Spjallað og smjattað á dýrindis pulsum í sól og smá golu.
Þrifin á grillinu fengu sína athygli, þrifum grillið með dökklituðum gosdrykk (einhver sýra í drykknum er víst voða öflugt þrifnaðarefni!)

Ohh, það er svo gaman í skólanum!! :o)

nammigott

2006-09-19T01:16:00.000-01:00

Í litla eldhúsinu við Vale Street er stelpa ein stundum að prófa nýja hluti, eitthvað nýtt í kvöldmat. Þetta er í uppáhaldinu:

KJÚKLINGUR MEÐ COUS COUS OG AVOCADO/SVEPPUM

kjúklingur: olía hituð á pönnu, cumin, chilliduft, engifer, hvítlaukur bætt við og kjötið steikt

cous cous: gert skv leiðbeiningum á pakkanum, salta smá og bæta við oggulítið af olíu

avocado og sveppir: steikja sveppi, bæta þeim út í smá maukað avocadoið. Krydda með sítrónusafa, cayenne pipar, koriander og cumin.

TÍGRISRÆKJUR Í THAI SWEET CHILLI SÓSU

olía, laukur, hvítlaukur, engifer, basil, chilli, tígrisrækjur, thai sweet chilli sósa, fiskisósa, smá vatn

Laukur steiktur í olíunni, kryddið sett á pönnuna og tígrisrækjurnar. Restinni bætt við, hitað í örstuttan tíma. Rækjurnar eru til þegar þær krulla sig upp.

SÚPA MEÐ KJÚKLING, BROKKOLÍ, KARTÖFLUM OG MAÍS

olía, laukur, kjúklingabringa, sojamjólk, mjólk, brokkolí, kartöflur, maískorn, koríander, engifer, svartur pipar, hvítlaukur, chilli

Steikja lauk á pönnu. Steikja kjúkling í pott. Bæta við sojamjólk og smá af mjólk (ef vill). Láta suðuna koma upp, bæta við kartöflum. Sjóða í 10 mínútur. Bæta restinni við.

lið

2006-09-17T03:48:00.000-01:00

Ef þú rifjar upp þá hópa (lið) sem þú hefur unnið í....

manstu, að það var alltaf einn sem kom með flestar hugmyndirnar og var þessi skapandi/listræni?
Og einum var umhugað um að fólkið í liðinu hefði það gott og hlustaði vel?
Sá þriðji var eiginlega með fullkomnunaráráttu, las yfir verkefnið áður en því var skilað, lagaði allar stafsetnignarvillurnar og svoleiðis?
Æi, síðan var sá fjórði sem var svo stjórnsamur...

Í hóp (liði) í gegnum árin, hefur þú oft verið í sama hlutverkinu?

Það virðist einhvern veginn vera þannig, að í hópum (liðum) virðist fólk oft leita í sömu hlutverkin - það/þau hlutverk sem liggja best fyrir viðkomandi. Auðvitað getur þetta svo breyst með tímanum.

Þessi hlutverk koma með ýmsa kosti inn í liðið og líka galla. Til dæmis þessi sem vildi endilega laga allar stafsetningarvillurnar, segir að verkefnið sé alveg handónýtt með öllum þessum innsláttarvillum. Getur virkað mjög smámunasamur, stressaður eða pirrandi á aðra aðila í hópnum.

Hvernig væri að reyna vera meðvitaður um sína eigin kosti og galla og reyna skilja kosti og galla allra aðila í hópnum? Það gæti kannski leitt til öflugri og skilvirkari hóps? :o)

(mæli með því að kíkja á þetta hér um hlutverk í hópum)

riiiiiiiisasýning

2006-09-14T07:35:00.000-01:00

Fór á riiiiisa matvælasýningu í dag. Nokkrar laugardalshallir þarna á ferðinni. Fullt af alls konar græjum, grænmetisbrytjurum, tækjum sem skera í sneiðar, litlar pökkunarvélar, vél sem vefur nori (þangpappírinn) utan um sushi!, ávaxtapressur, ofnar, kælar, ......ekki fyrir stórar verksmiðjur, heldur meira miðað á lítil fyrirtæki og hótel. Margt athyglisvert á þessari sýningu.

-og fullt af mat. Brauð, kökur, sætabrauð, kjöt, fiskur, paté, ís, vatn, súkkulaði, olíur, krydd, vín, ostar, te, kaffi, asiskur matur, asiskir drykkir.

Smakkaði
**tasmanskt lambakjöt, svaaaaakalega gott!
**tasmanskan lax, heitreyktan og kaldreyktan. Athyglisvert að finna muninn.
**ís, sem hefur hlotið nokkur verðlaun. Nammigott.

Smakkaði
**kínverksa dumplings
**súkkulaði
**ávaxtasafa og gosdrykk með ávaxtabragði
**súkkulaði með plómufyllingu og aðra týpu með roseberries
**reykta önd
**ís. Ekkert spes, alltof harður.

Smakkaði
**alls konar brauð og sætabrauð
**osta
**lambakjöt og nautakjöt
**rautt mexikósnakk, grænt mexíkósnakk. Skærrauður og skærgrænn litur frekar fælandi á snakki.
**ís. Sendinn á tungunni, ekkert spes ís.

Smakkaði
**macadamia hnetur og macadamia olíu
**hrisgrjónamjólk og hrísgrjónamjólk með viðbættu próteini
**ís, allt í lagi týpa
**vatn með ávaxtabragði
**reyktan lax
**hvítvín

Smakkaði
**risarækjur
**kræklinga og clams
**súkkulaðibúðing....hriiikalega góður!
**pizzu
**grískan, steiktan ost (Saganaki) - öðruvísi, gott, gott, gott :o)
**plómubúðingur
**gulrótarmauk ofan á brauð
**súkkulaðihúðaðar kaffibaunir
**ís.

~er hálf bumbult núna, kannski ekki skrýtið!~

tveir pokar fullir af góðgæti fylgja mér heim....maður fékk sko almennilegt nesti á sýningunni ;o)

6 litlar vikur....

2006-09-12T11:37:00.000-01:00

Varð litið á dagatalið áðan....hjartað tók nettan kipp....jeeeeeminn eini, bara rétt um 6 litlar vikur í prófin!! (sum námskeið klárast um miðjan október, önnur um mánaðamót okt/nóv)

á þessum litla tíma á svooooo margt eftir að gerast, td klára nokkur verkefni, SLPast heilan helling og ég veit ekki hvað og hvað

-úff púff-

Veðrið ískyggilega gott, hvernig á maður að tolla inni til að læra?
Þónokkur verkefni sem þarf að skila.
Æi, ætli maður verði ekki að hanga inni...

indverskir dagar

2006-09-09T07:01:00.000-01:00

Fór með nokkrum indverskum félögum á indverskan veitingastað fyrir stuttu. Á borðinu birtist karríkjúklingur og nanbrauð. Jógúrtdrykkurinn lassí í glasi. Engin hnífapör. Rifjaði í snarheitum upp Indverskir matarsiðir 101 úr heimsreisunni. Vinstri hendin fer í frí, hægri hendi sér um að taka brauðið í bita, dýfa því í rækilega kryddað karrýið. Njóta, mmm....svooooo góður matur! :o)

-viðburðurinn sem hafði verið planaður með litlum fyrirvara varð að veruleika-

Stelpur í sarí eða öðrum indverskum fötum. Strákar í síðum, víðum kuflum.

Dúndrandi Bollywood tónlist. Indverjarnir alveg með hreyfingarnar og dansinn á tæru. Mjúkar mjaðmahreyfingar, hendurnar liðast um, axlirnar hristar. Ekki indverjar voru bara pínulítið stirðari í hreyfingum ;o)
Hópdans, hringdans, alls konar dans.
Bros, kæti, gleði og hlátur.

Hvað þarf að gera?

2006-09-06T10:08:00.000-01:00

Hvað þarf að gera fyrir eitt stykki Bollywood partý fyrir um 150 manns (ágóðinn rennur til góðgerðasamtaka)?

Ehh....

Nokkur atriði:

finna hentugan stað, ódýran, nógu stóran fyrir 150/200 manns, með bar og öryggisgæslu, líka skoða hvort staðsetningin sé hentug
auglýsa stuðið, nota til dæmis email, sms, lítil dreifirit, prenta plaköt og smella þeim á valda fleti í skólanum, virkja tenglslanetið, láta orðið berast. tók smá tíma að hanna plakatið...
selja miða, auðvitað hann þá og prenta fyrst!
finna skífuþeyti (DJ), ganga úr skugga um að allur skífuþeytibúnaður virki, ef ekki, hvað vantar? hvar fæst það og hver er kostnaðurinn?
finna sjálfboðaliða til að aðstoða, upplýsa þá um tilgang viðburðarins, hvar, hvenær og allt það...
umsjónarmaður sjálfboðaliða
fjármálamanneskja
græja alls konar smáatriði (td danskennslu, danssýningu, fjáröflunarskemmtiatriði og fleira og fleira)

Tíminn hefur verið mjög knappur til að undirbúa þennan viðburð. En einhvern veginn, þá er þetta allt að smella saman. Ekki seinna vænna, föstudagur er dagurinn. Virkja félagana í liðinu, hvetja fólk áfram. Gera atburðinn að veruleika - sem lið.

Mikið roooosalega hef ég lært mikið á því að leiða þetta verkefni....

fólk

2006-08-31T10:23:00.000-01:00

Fólk.
Í öllum litum, öllum stærðum og gerðum.
Hvert og eitt með sína eiginleika, kosti og galla.
Þegar við vinnum saman, nýtum hæfileika hvors annars, getur útkoman verið gífurlega öflugur hópur.

Undanfarið hef ég deilt stundum með fullt af fólki. Dagarnir hafa eiginlega verið eitt stórt stefnumót, fundir hér og þar, hópavinna, samræður og heimsóknir. Fólk sem er svo jákvætt, bjartsýnt, orkumikið og gefandi. Ólýsanlega ánægjulegt að kynnast öflugum, skilvirkum hópum og frábæru fólki.
Takk fyrir að auðga líf mitt.

Hamingjuóskir dagsins fær kærastinn, til lukku með áfangann ;o)

flutningar

2006-08-28T09:17:00.000-01:00

Pakka í kassa fyrir nokkrum mánuðum.
Flytja svo sjálf heimshorna á milli, taka einungis það allranauðsynlegasta með.
Láta bara aðra um að flytja kassana á Íslandi.

Helduru að það sé þjónusta, ha? :o)

-þakklæti til þeirra sem báru alla þessa kassa-

tíminn og stúlkan

2006-08-25T05:24:00.000-01:00

Háskólastúdentinn að verða smá upptekinn þessa dagana. En það bara fínt að hafa pínku pons of mikið að gera. Hafa smá pressu eins og það getur líka heitið.

Einstaklingsverkefni í skólanum. Það er nú bara klassík, alltaf einhver svoleiðis verkefni á dagatalinu.
Hópverkefni í skólanum. Líka klassík. Mjög áhugavert viðfangsefni og hópurinn sömuleiðis. Verkefni út af fyrir sig að leiða hópinn.
SLP (stúdentaleiðtogaprógramm). Þrenn verkefni í gangi undanfarið, eitt kláraðist í gær. Datt svo í það hlutverk að leiða skipulagningu á Bollywood partýi (fyrir 200 manns) og undirbúning fyrir kakóhitting. Er og verður rosa gaman :o)

Lestur á skólabókunum, netheimildum og fimm öðrum áhugaverðum bókum er þarna einhvers staðar inn á milli.

Stony Point

2006-08-23T08:05:00.000-01:00

Var að smella inn myndum frá agnarlitlum punkti á landakortinu, Stony Point.

Díselfnykur í nebbanum. Lestin skröltir eftir teinunum. Boink, þarna voru greinilega samskeyti. Ískrar líka skemmtilega mikið í lestinni eða einhverju. Sætin minna á sæti úr eldgamalli flugvél. Sætin eru doldið "þreytt". Skröltið, ískrið og þreyttu þreyttu sætin minnir rækilega á lestarferðir í Austur-Evrópu. Algjör andstæða þess sem ég hef annars upplifað hér í Ástralíu.

Hitinn í lestinni ansi góður. Hurð er þrykkt upp, þrekinn maður í peysu merktri lestarfyrirtækinu biðst afsökunar á hitanum. Einhver stilling er biluð, en já, afsakið hitann - afsakið hitann. Svo röltir hann upp eftir ganginum flautandi lagstúf. Skömmu síðar kemur sami maður aftur, flautandi sama lagstúfinn. Everyone has a validated ticket? Can you please validate your ticket, just to make the day a little bit easier for all of us. Svo brosir hann sínu blíðasta, röltir niður eftir ganginum og heldur áfram að flauta litla lagstúfinn. Er ekkert að skoða miðann hjá öllum farþegum eins og miðaskoðararnir gera í borginni, neehhh...þessi er voða líbó á því.

-Stony Point-

Áhugafiskarar mættir á bryggjuna. Missjón dagsins: reyna veiða fisk maður. Glittir í silfurlitt hreistur hjá einum fiskaranum. Æ, þessi er bara lítill, dugar varla í fiskisúpu handa einni manneskju. Einhver annar dró hálfan smokkfisk upp úr sjónum, hauslausan. Tveir félagar pakka saman - það veiðist ekkert í dag.

Flamingófugl baðar sig í sjónum. Í leirdrullunni í fjöruborðinu er annar flamingó í gönguferð.

Smelli síðustu myndunum, held svo heim á leið.

Brighton Beach, Williamstown og Stony Point

2006-08-21T09:50:00.000-01:00

Brighton ströndin, Williamstown og smáhluti af Mornington skaganum (nánar tiltekið Stony Point) eru nýjasta myndefnið.

Og hvað er svona spes við þessa staði?

Á Brighton ströndinni eru þónokkrir litlir kofar málaðir í hinum ýmsustu litum. Doldið skemmtilegt.

Williamstown er dæmigerður sjávarbær. Rólegt, rólegt, rólegt. Mávar og sjávarlykt í nebbanum.

Mornington skaginn liggur út frá Melbourne. Fullt af litlum bæjum á skaganum. Sjávar/smábæjarfílingur. Myndir af því á leiðinni inn bráðlega.

Stutt útgáfa: Myndir frá Brighton Beach, Williamstown og smá ljósmyndagaman er að finna á myndasíðunni.

sykurbúðin

2006-08-17T10:09:00.000-01:00

Það er búð í næstu götu, sem sérhæfir sig í brjóstsykursgerð.

Hægt að horfa á nammigottið búið til, alveg frá sykurbráðinni til þess að molarnir eru komnir í poka eða glerkrukku.

Bæta litar- og bragðefnum við sykurbráðina, hnoða, hnoða, hnoða og hnoða. Móta eitt lag af þessum lit, kæla, líma saman sykurfleti af sitt hvorum litnum, velta sykurkögglinum, hnoða, hita. Að minnsta kosti 10 kílógramma sívalningshlunkur. Teygja á massanum, svona já....gera þetta þunnt eins og sogrör. Kæla. Brjóta í mola.

Litríkir molar smjúga svo upp í munninn á fólkinu sem horfði agndofa á - mmm, piparmyntubragð.

djassaður Davis

2006-08-16T02:42:00.000-01:00

keypti geisladisk um daginn. datt niður á hann í tónlistarbúðinni og hreinlega gat ekki annað en keypt hann. bara varð.

hver er svo gripurinn? Kind of blue með Miles Davis

algjört nammigott fyrir eyrun mín

manntal og tölfræði

2006-08-14T10:16:00.000-01:00

Það var ekki einhver ein auglýsing í póstkassanum um daginn. Onei. Heill poki takk fyrir af pappír!

Forvitnin þvílík, hvað er þetta nú eiginlega??

Eftir smá skoðun komst botn í málið. Það er manntal í gangi þessa dagana. Ekki bara manntal heldur vill tölfræðiskrifstofan líka gjarnan fá alls konar aukaupplýsingar um einstaklinginn. Hér eru nokkur dæmi:
-hvernig fór einstaklingurinn í vinnu tiltekinn dag í ágústmánuði?
-hver er trú einstaklingsins?
-talar einstaklingurinn annað tungumál en ensku heima hjá sér?
-hversu mörg börn hefur hver kona a heimilinu eignast?
-eyddi einstaklingurinn einhverjum tíma sem sjálfboðaliði hjá samtökum eða hóp á síðustu tólf mánuðum?

Þessi síðasta spurning fannst mér ansi athyglisverð og það af tvennu. Ég hef verið sjálfboðaliði hér og það að vera sjálfboðaliði virðist vera nokkuð ríkt í samfélaginu. Af hverju vill fólk gerast sjálfboðaliði? Margar ástæður fyrir því, td. að gefa til baka til samfélagsins, prófa eitthvað nýtt, taka þátt í þörfum verkefnum sem annars gætu ekki verið framkvæmd. Árið 2000, voru sjálfboðaliðar eldri en 18 ára 72 klukkustundir á ári í sjálfboðavinnu að meðaltali. Nokkuð gott.

tjáningarstíll í ágreiningi

2006-08-10T07:21:00.000-01:00

Hvernig bregstu við þegar þú lendir í ágreiningi?

Líklegast bregðumst við flest misjafnlega við. Fer allt eftir því hvers eðlis deilan er, spennunni/álaginu sem deilan felur í sér, hver mótaðilinn er og hvort við þekkjum viðbrögð mótaðilans í þessum kringumstæðum. Menningarlegur bakgrunnur getur einnig spilað inn í.

Almennt séð virðist fólk hafa tilhneigingu til að:

tala óbeint um ágreininginn (vonast til að mótaðilinn skilji það sem þú segir/lesi milli línanna) og halda tilfinningum utan við ágreininginn (leitast við að vera rólegur)
koma beint að kjarna ágreiningsins og halda tilfinningum utan við spilið
tala óbeint um ágreininginn og vera tilfinningasamur (hækka róminn/baða út höndum/benda)
koma beint að kjarna ágreiningsins og vera tilfinningasamur

Enginn einn tjáningarstíll er réttur eða rangur, hafa allir sína kosti og galla.

Fólk með mismunandi tjáningarstíl getur átt erfitt með að skilja hvort annað, getur auðveldlega misskilið hvort annað og valtað yfir hvort annað.
-liggur líklegast ljóst fyrir-
Og hvað er hægt að gera í slíku dæmi?
-reyna átta sig á hvað það er við hegðun mótaðilans sem lætur mig telja að hann sé td þrjóskur/ergjandi/pirrandi/óframfærinn/feiminn og leitast við að skilja hvað viðkomandi er að reyna segja-

Einn flokkur af tjáningu er venja í einu landi/menningarheim (almennt séð) á meðan það telst argasti dónaskapur í öðru landi/menningarheim.
-oft er þessi munur ekki ljós, og getur því valdið misskilning, vanlíðan og enn meiri vandræðum en fyrir voru...-
Smá dæmi: "Ég heyri alltaf í börnunum þínum spila á píanóið þegar ég kem heim úr vinnunni, þau eru orðin mun betri en þau voru áður." Í menningarheim sem talar óbeint um ágreininginn og heldur tilfinningum fjarri málinu, gæti þetta verið skilið sem "það pirrar mig afskaplega mikið að heyra píanóglamrið í krökkunum þínum þegar ég kem heim úr vinnunni, segðu börnunum þínum að hætta þessu".
-ef seinni setningin hefði verið notuð í þessum menningarheim er hún nokkuð líkleg til að setja allt á annan endann og gera deiluna enn verri-

Þetta var lærdómur dagsins, í hnotskurn.

leiðtogavika

2006-08-08T10:20:00.000-01:00

Þessa vikuna er leiðtogavika í skólanum, skipulögð af SLP (student leadership program). Leiðtogavikan samanstendur af fyrirlestrum og workshops. Viðfangsefnin eru fjölbreytt; tengslanet, samskiptaleyndarmál fyrir framúrskarandi leiðtoga, menningarárekstrar og úrlausn þeirra og síðast en ekki síst, hvernig er hægt að veita liðinu sínu innblástur og hvatningu. Held þetta verði athyglisverð vika :o)
Og af hverju held ég þetta sé athyglisvert? Nú, skilningur á þessum málefnum getur komið sér mjög vel í hópvinnunni sem framundan er í náminu og auðvitað líka á öðrum sviðum lífsins...

Ég hlakka til, verður gaman að heyra í frábærum fyrirlesurum tala um athyglisverð efni og spjalla við fólk yfir glasi af appelsínusafa. Jájájá... :o)

tengslin

2006-08-03T07:04:00.000-01:00

Reykskynjarar, reiknivélar, pappírstætarar, pennar, bangsar og uppskriftabækur.
Hvað skildu þessir hlutir eiga sameiginlegt?

*Fyrstu þrír gætu þurft rafmagn til að virka við hefðbundna notkun

*Allt nema bangsinn gæti verið hart

*Gæti verið selt í ritfangaverslun

*Finnst líklegast á nokkuð mörgum heimilum, nema kannski pappírstætarinn

*Pennar og bangsar gætu kannski talist til barnaleikfanga, það myndu reykskynjarinn og pappírstætarinn líklegast seint gera

Og hvað meir?

Pósthúsið. Já, auðvitað, pósthúsið maður! Þvílíka vöruúrvalið á sumum pósthúsunum í þessari borg, takmörkin eru sko ekki sett við frímerki, umbúðir og umslög. Onei. En ég sé bara ekki alveg tengslin á milli td reykskynjara í lausasölu, bangsa og póstþjónustu....hvað segir þú?

toffee eða caramel?

2006-08-01T03:50:00.000-01:00

Hver er munurinn á toffee og caramel?

Lenti í smá veseni, því hugurinn minn skilur bæði orðin sem bara karamellu.

Þessi heilabrot minntu mig á hvað Karamellan er hæfileikarík. Getur dregið fyllingar úr tönnum á næstum því nó tæm.

Einhver stelpa (ekki ég! hehe...) var einn jóladaginn hjá afa sínum og ömmu. Ákvað að smella einni karmullu í munninn og tyggja smá. Og hvað gerðist? Angistarsvipur, neyðarsímtal til tannsa. Tannsi í fínustu fötunum, hann var á leiðinni í jólamatarboð en ákvað að aðstoða skvísuna. Mikið rosalega var stelpan þakklát.

Hvort finnst þér betra, mjúk eða hörð karamella (eða toffee)?
-endilega smelltu þínu áliti í kommentin

súkkulaði og myndir

2006-07-31T10:44:00.000-01:00

súkkulaði finnst mér alveg agalega gott

hvítt súkkulaði - eehhh....
-eridda súkkulaði????
-ekkert vont á bragðið, passar vel í möffins með perubitum
-en eeretta súkkulaði?? eriggi einu sinni súkkulaðibrúnt, kommon...
mjólkursúkkulaði - jájá
dökkt súkkulaði - ójá!

datt niður á eina súkkulaðitýpu, sem er alveg ótrúleg. súkkulaðið sjálft svo silkimjúkt og svo þessar líka góðu hnetur. mmmm....algjör draumur
dökkt súkkulaði eitt og sér líka fínt. hefur verið uppáhaldið árum saman.
dökkt súkkulaði með rauðvínslegnum rúsínum er toppurinn. segjum til dæmis á eftir kengúrusteik og rauðvíni...þvílík sæla....

en annars, það eru víst nokkrar 'nýjar' myndir hér

Melbornska Melabandið

2006-07-28T08:28:00.000-01:00

jebb, kikkaði á tónleika hjá sinfoníuhljómsveit Melbourne síðasta fimmtudag. var alveg hreint stórfínt :o)

að utan lætur listamiðstöðin (tónleikahúsið) ekkert mikið yfir sér, ok smá stórt hús en ekkert svo. en þegar inn var komið......
húsið á amk fjórum hæðum
hlustendabekkirnir á fjórum hæðum
rúllustigi og alles til að færa fólkið milli hæða
-þvílíkt hús-

sætið mitt leyndist á fjórðu hæðinni, alveg fyrir miðju (beint á móti hljómsveitinni). príma góð staðsetning. horfði eiginlega ofan á hausana á spilurunum. það var soldið skrítið.

fínasta dagskrá; Koehne (Nocturne No. 1 - Twilight) , Rachmaninov (Rhapsody on a Theme of Paganini) og R. Strauss (An Alpine Symphony).

bandið var ansi öflugt á tímabili, td 8 kontrabassar, 5 básúnur, 2 hörpur, 9 horn og óteljandi fiðlur (ok, ansi margar fiðlur). 5 slagverksleikarar.

gaman að fara á góða tónleika :o)

Vorið

2006-07-27T04:44:00.000-01:00

Hef sofið alveg sérdeilis illa undanfarnar nætur. Hef ekki getað sofnað, vakna 20x yfir nóttina, er sjóðandi heitt og sef laust. Gerir það að verkum að daginn eftir hefur stúlkan verið hálfsofin og þreytt eftir því. Frekar óþægilegt.

Hvað veldur????

Eftir smá spekúleringar....
þá held ég barasta að vorið sé komið, eða er alveg að koma.
Lofthitinn er orðinn ögn meiri og sólin lætur undan sýniþörfinni.
Viðeigandi kælingarráðstafanir voru gerðar og stúlkan svaf mjög vel síðustu nótt :o)

Vorið já.

Úlpa eða hlý peysa er algjört bull yfir hlýjasta tíma dagsins. Stuttermabolur, það er sko málið.
Og sólgleraugu.
Langaði ekkert að fara inn og læra í dag. Veðrið svo gott, jú sí...lét undan, tyllti mér á bekk og sötraði ávaxta/jógúrthristing af mestu ánægju :o)
Treflar og vettlingar fáséð fyrirbæri, orðin safngripir þangað til næsta haust.
Kærustupör aftur farin að kúrast og knúsast í grasinu fyrir framan Fylkisbókasafnið. Fólk að tylla sér á bekki og glugga í blöð eða gæða sér á einhverju nammigotti.

Virkar á mig álíka mikið merki um vor/sumar og yfirfullar sundlaugarnar eða Austurvöllurinn á góðum íslenskum sumardegi.

myndir myndir

2006-07-25T06:09:00.000-01:00

~var að smella inn nýjum myndum~

myndefnið er Ballarat, Gullárabær og svo íbúðin mín

fyrsti skóladagurinn og Ballarat

2006-07-24T09:54:00.000-01:00

einhverjir þrjótar að skemmileggja kommentin á síðunni...iss iss
en endilega, ættingjar og vinir, ekki hætta að setja inn komment. núna þarf sá sem kommentar bara að stimpla inn nokkra bókstafi og ýta á hnappinn innskráning og birta (login and publish).

jæja jæja...

Fyrsti skóladagurinn á þessari önn var í dag. Bara fínt að byrja aftur í skólanum, byrja aftur í SLP, hitta félagana og nýtt fólk.
Og nottla fá nokkur verkefni :o)

Kíkti út fyrir borgina um síðustu helgi. Fór í aðra borg, hehe. Svona smá ferðalag, stórfínt. Staðurinn var Ballarat, um 80.000 manna borg í um 1,5 klukkustundar fjarlægð frá Melbourne í lest. Virkaði á mig sem pínulítið þorp - ferlega rólegt og afslappað.

Hús í Ballarat, húsið vinstra megin er hótel.

Í Ballarat er verksmiðja þar sem þekkt nammigott er búið til...

Kíkti líka á útgáfu af lífinu eins og það var kannski á árunum um og uppúr 1850. Gullárabær; gamaldags hús, fólk í fötum þess tíma, verslanir sem seldu td. brjóstsykur, bróderí, kengúruhatta og tréleikföng. Smelli inn nýjum myndapakka með myndum frá Ballarat og fleiru, á morgun. Á morgun segir sá lati, en hva, það er kominn tími á kvöldmat hérna megin á kringlunni...og eftir kvöldmat er áætlað að lesa nokkrar sögur úr heimi áströlsku frumbyggjanna.

indverskur => salat daginn eftir

2006-07-20T06:50:00.000-01:00

gerði indverskan mat um daginn:

-kjúklingabringa
-tómatþykkni (puree)
-hrein jógúrt
-brokkolí
-kartöflur
-gulrætur
-chilli, cumin (ekki það sama og kúmen!), svartur pipar, garam masala, fennel, engifer, hvítlauk, koríander og kanil.
kjúklingurinn steiktur á pönnunni, hinu blandað við og látið malla í smá tíma og svo kryddað.
hrísgrjón og indverskt brauð með.

bragðið fínt og alles, bara doldið mikið þungt í magann.....þannig að daginn eftir hafði mín varla lyst á morgunmat. af sömu ástæðu varð kvöldmaturinn það kvöldið í léttari kantinum (salat með kjúklingabringu):

-kjúklingabringa steikt í kryddblöndu a´la Katrín Ásta
-iceberg
-önnur tegund af salati, eitthvað krullað grænt salat
-rauð paprika
-tómatur
-svartar ólífur
-rauðlaukur
-extra virgin ólífuolía
-balsamik edik
-hnetur og furuhnetur

skar niður allt græna dótið. ristaði hneturnar á pönnu, steikti kjúklinginn í kryddblöndunni og setti þetta á toppinn á salatinu. blandaði saman olíunni og balsamid edikinu og bragðbætti salatið. stökkar ostastangir með, settu alveg punktinn yfir i-ið.

ansi gott barasta :o)

ástin

2006-07-19T08:04:00.000-01:00

brosið þitt, röddin, meira að segja prumpulyktin líka
hláturinn, húmorinn
sakna þess alls

líka að haldast í hendur
drekka kaffi saman
-þó ég drekki kaffi með öðru fólki, þá er það ekki eins-

það vantar þig

fyrstu dagarnir eftir að þú fórst voru lengi að líða
ef ég hugsaði um þig komu tár í augun

heitir þetta ást? ég held það barasta

ætla ekki að vera sorgmædd og sakna
það bara gengur ekki
hugsa fram á við, njóta þess sem ég upplifi hér

ástin er í hjartanu og fer ekki burt
ég hlakka til nóvember

vatnsdroparáðstefna (rigning)

2006-07-17T06:49:00.000-01:00

smá rigning í gær
líka daginn þar á undan
og reyndar líka daginn á undan þeim degi
þungskýjað í dag, ætli hann rigni?

einhvern veginn svona hafa síðustu dagarnir verið. vatnsdroparáðstefna (rigning) eða hann er þungskýjaður og rétt svo hangir þurr. gerir það að verkum að loftrakinn verður mikill, handklæðið inni á baði er rennandi blautt eða í besta falli hálfrakt. það nær aldrei að þorna alveg.

akkurat núna er um 90% loftraki.

ef það rignir á eftir, munu regndroparnir detta beint niður. það er nefnilega svo lítill vindur. þá er sko stórskemmtilegt að eiga regnhlíf og spóka sig um :o)

myndir

2006-07-13T08:12:00.000-01:00

~nýjar myndir á myndasíðunni~
mest gaman að skoða þær sem slideshow :o)

einkunnir

2006-07-10T04:08:00.000-01:00

Einkunnirnar fyrir síðustu önn voru birtar í dag.

Bros út að eyrum segir allt sem segja þarf :o)

durian

2006-07-06T08:04:00.000-01:00

Var að bragða á mat með durian bragði í annað sinn á ævinni. Ekki get ég sagt að bragðið venjist...

Smá meir um durian; lyktin er ólýsanlega ógeðsleg, bragðið jafnvel enn verra. Bæði minnir einna helst á verulega skemmda vanillu eða fisk. Einfaldlega ógeð.

Jæja jæja, labbaði framhjá ísbúð og sá að durian ís var í boði í dag. Vitandi það að kærastinn hafði ekki bragðað á herlegheitunum, hvatti ég gæjann til að prófa. Það er nú ekki á hverjum degi sem svona tækifæri gefst.

"Hafið þið prófað durian áður?" spurði ísdaman. Og það er nottla ástæða fyrir þessari spurningu, öll ísbúðin angaði af þessari hrikalega óskemmtilegu durian lykt. Ein durian ískúla sett í box, ein súkkulaðikúla líka. Tyllum okkur á stóla fyrir utan ísbúðina, ísboxið sett á borðið og skeiðunum dýft í durianið. Einn tveir og....upp í munn....ekki svo slæmt....en allt í einu kemur þessi roooookna gretta á gæjann minn og ætli svipurinn á mér hafi ekki verið svipaður. Þvílíkt og annað eins ullabjakk!!! Annað okkar var kjarkaðra (eða þrjóskara) en hitt og kláraði durianísinn í boxinu. Hinn aðilinn sat á móti og hló að viðurstyggilega svipnum sem birtist eftir hverja durian skeið. Svo má nú alveg giska á hver sá þrjóski var...

Allavega, ísinn var kláraður og hann verður ekki keyptur aftur. Nema kannski ég fái þá hugmynd að kynna þetta fyrir öðru fólki sem kemur í heimsókn hingað til Melbourne, hehe :o) spurning hvort einhver þori...

Sitjum hérna við tölvu, öngum af yndislegri durian lykt. Yndisleg bræla já. Sat strákur hérna við hliðina á okkur, hann er löngu farinn. Ætli hann hafi ekki flúið durian stybbuna af okkur?

vínraki

2006-07-04T06:55:00.000-01:00

Setti í þvottavél, þrír dagar síðan. Enn hangir þvotturinn á þvottagrindinni, rennandi blautur.

Jahá.

Það er greinilega eilítið erfitt fyrir þvottinn að þorna þegar rakinn umhverfis er of mikill. Spurning hvort fötin fái ekki bara að hristast í þurrkaranum í kvöld...svona svo það komi ekki fram rakaskemmdir á veggjunum í litlu íbúðinni minni.

En að allt öðru; prógrammi dagsins í dag. Fótunum var dinglað út um hliðarnar á Puffing Billy (gufulest), ferlega gaman. Tútúúúú og lestin rúllaði rólega af stað um sveitina. Ferguson, Richmond og Chandon vínhúsin voru líka heimsótt í dag. Nokkur vínglös runnu ljúflega niður, en ekki hvað. Skemmtilegast var þó að prófa freyðandi rauðvín, doldið örruvísi!

Áströlsk vín, áströlsk country tónlist um hann Ned Kelly, grillað ástralskt nautakjöt á teini, brauð og ostar. Stúlkan í vetrarfríi. Held barasta þetta gerist varla betra :o)

St Kilda Beach

2006-07-03T07:17:00.000-01:00

Ooohhh...það er svo gaman að kíkja niður á strönd :o)
Hvítur sandurinn, fallegur sjórinn, kvakandi fuglar og snoturt útsýni. Heiður himinn og sól. Litlar sjoppur sem selja ís og kalda drykki, kemur sér sko vel í hitanum. Ó beibí....þetta er svo ljúft.

Þennan daginn er ströndin tóm, við erum eina fólkið að spóka okkur í hvíta sandinum. Bikiníið og strandhandklæðið "gleymdist" heima. Sjórinn er hvítfissandi. Er fegnust því að vera í hlýrri úlpu, með trefil um hálsinn og vettlinga á puttunum. Það er nefnilega vetur, rok og vel kalt. Þarna út úr einu húsinu sprettur kall í sundskýlu og arkar út í sjóinn. Sá er hugaður.

Röltum okkur frá ströndinni. Í næstu götu leynast nokkrar kökubúðir, ómótstæðilega girnilegar kökur og sætabrauð í gluggunum. Það er allt í lagi þó litlu ís/kaldadrykks sjoppurnar á ströndinni hafi verið lokaðar, það er sko miklu betra að fá sér heitt mokka kaffi og súkkulaðiköku í vetrarkuldanum :o)

新留影

2006-06-29T06:42:00.000-01:00

Nýjar myndir (skrifað á mandarin). Jájá, maður er sko ekki bara að læra matvælafræði hérna suðurfrá ;o)

Endilega, kíktu á myndasíðuna þar leynast nýjar myndir. Mæli með því að skoða þær sem slideshow, miklu flottara þannig.

skór

2006-06-26T03:47:00.000-01:00

Ástralir fara víst ekki úr skónum heima hjá sér...alltaf upplifir maður eitthvað nýtt. Í sumum löndum eru inniskór í hávegum hafðir.

Þetta er bara svo misjafnt.

~sinn er siðurinn í landi hverju, ójá~

Þinghús Viktoríu

2006-06-25T07:27:00.000-01:00

Þinghús Viktoríufylkis var opið í dag, til sýnis fyrir almenning. Viktoríska þingið er nefnilega 150 ára gamalt í ár, ungabarn miðað við íslenska þingið. Eníveis....við túristarnir tókum stefnuna á Viktoríska þinghúsið í dag.

Litlir þröngir gangar út um allt. Matsalur, svalir og fínasti garður. Skoðuðum líka kjallarann í húsinu - greinilega enginn vínkjallari þar á ferðinni, leyndust engar vínflöskur þarna. Ríkisstjórnin situr andspænis stjórnarandstöðunni í þingsalnum, grænir stólar, dökkt timburverk og kallar með hvítar hárkollur. Smá ´british style´. Tímaglas á miðjuborði þingsalarins, svona til að gæjarnir og píurnar tali nú ekki of lengi.

takk

2006-06-21T06:25:00.000-01:00

Takk fyrir allar afmæliskveðjurnar!! :o)
Kveðjurnar voru á öllum mögulegum formum. Hér á blogginu, sem email, sms, símtöl, bréf, póstkort, umslög og pakkar.

Takk takk takk :o)

25 ára

2006-06-18T03:19:00.000-01:00

ég á 25 ára afmæli í dag :o)

myndir

2006-06-16T08:37:00.000-01:00

~smellti nokkrum myndum á myndasíðu~

mæli með því að skoða þær sem slideshow, miklu flottara þannig ;o)

Stefansdottir

2006-06-16T05:05:00.000-01:00

Ste....eehh...how do you pronounce that??

Einn kennarinn gafst upp og sagði bara Stefano, hehe :o)

brosandi hringinn

2006-06-14T10:03:00.000-01:00

jájájá....mín brosandi hringinn núna :o)

Þvílíkur léttir að vera búinn með prófin, klára fyrstu önnina og kærastinn á leiðinni hingað suðureftir í næstu viku, jibbííí :o)

Hvað liggur fyrir næstu daga? Dekra smá við sig í tilefni próflokanna - jájá, það held ég nú. Pakka óskemmtilegri fögunum niður. Tjahhh, eða upp í hillu, heitir það að pakka upp?? Njóta borgarinnar og lífsins, án skólabókanna!